పన్ను దొంగ పనిబట్టేందుకు ఉపగ్రహం సాయం! ఓ కేసును పరిష్కరించాలంటే పోలీసులు ప్రత్యక్ష సాక్షులు, ఘటనాస్థలంలో ఆధారాలు లేదా ఫోరెన్సిక్ నిపుణుల సాయం తీసుకుంటారు. కానీ ఘజియాబాద్లో ఐటీ అధికారులు ఏకంగా ఉపగ్రహ సహాయమే తీసుకున్నారు. తొలిసారిగా దేశంలో శాటిలైట్ సాయంతో పన్ను ఎగవేత కేసు పరిష్కరించారు. ఇదీ కథ...
మూడేళ్ల క్రితం ఉత్తరప్రదేశ్ గజియాబాద్లోని మోదీనగర్లో ఓ వ్యక్తి భూమి కొనుగోలు చేశాడు. వ్యవసాయ భూమి అని చెప్పి రూ.30 లక్షలకే రిజిస్టర్ చేసుకున్నాడు.
నిజానికి అది వ్యవసాయ భూమి కాదని 2018లో ఐటీశాఖ అధికారులకు ఫిర్యాదు అందింది. కానీ దర్యాప్తు చేసినా ఆధారాలు లభించలేదు. హైదరాబాద్లో రిమోట్ సెన్సింగ్ ఏజెన్సీని సంప్రదించింది ఐటీ శాఖ. ఉపగ్రహం సహాయంతో మూడేళ్ల క్రితం ఆ భూమి ఎలా ఉందన్న నివేదిక తయారు చేసి అప్పగించింది రిమోట్ సెన్సింగ్ ఏజెన్సీ. అది వ్యవసాయ భూమి కాదని, అక్కడ వాణిజ్య సముదాయం ఉందని శాటిలైట్ చిత్రాల ద్వారా స్పష్టమైంది.
ఆ యజమాని రూ. 15 కోట్ల పన్ను ఎగవేతకు పాల్పడ్డట్లు ఐటీ అధికారులు నిర్ధరించారు. రూ.15కోట్లకు తోడు ఆ మొత్తంలో 90శాతం జరిమానాగా వసూలు చేసేందుకు సిద్ధమయ్యారు.
"ఆధునిక సాంకేతికతను ఉపయోగించి అక్రమార్కుల పని పట్టవచ్చు. కొందరు మాది వ్యవసాయ భూమి అని చెబుతారు. గోధుమలు, వరి, చెరకు సాగు చేస్తున్నామని తహశీల్దార్తో రాయించుకుని వస్తారు. కానీ... అక్కడ ఏ పంట ఉండదు. ఖాళీగా ఉంటుంది. కానీ మేం ఏమీ చేయలేము. అక్కడ పంట ఉందో లేదో మేము నిరూపించలేం. ఇప్పుడు ఈ సాంకేతికత ద్వారా వ్యవసాయ ఆదాయం గురించి సమర్పించే లెక్కల్లో నిజానిజాలు తేల్చవచ్చు."
--- అమ్రేంద్ర కుమార్, ఆదాయపు పన్నుశాఖ డైరెక్టర్, కాన్పుర్
భూ రిజిస్ట్రేషన్ సమయంలో అక్రమాలకు పాల్పడ్డ సిబ్బందిపైనా ప్రభుత్వం చర్యలు తీసుకుంది.
