ఒకే రోజు మూడు ఏనుగులు మృతి.. ఏం జరిగింది?

దేశంలో వరుస ఏనుగుల మరణాల ఘటన జంతు ప్రేమికులకు తీవ్ర విషాదాన్ని మిగుల్చుతోంది. తమిళనాడులో కోయంబత్తూర్​ అటవీ ప్రాంతంలో గురువారం మూడు ఏనుగుల మృతదేహాలను గుర్తించారు అటవీశాఖ అధికారులు. మరోవైపు ఇటీవలే అనారోగ్యం పాలైన మరో ఏనుగు పరిస్థితి విషమించినట్లు తెలిపారు.

తమిళనాడులోని కోయంబత్తూర్​ అటవీ ప్రాంతంలో గురువారం మూడు ఏనుగుల మృతదేహాలు లభ్యమయ్యాయి. అదే ప్రాంతంలో అనారోగ్యం పాలైన మరో ఏనుగును గుర్తించారు అధికారులు.

బుల్లెట్​ గాయంతో..

మెట్టుపాలాయంలోని కండియూర్ అటవీ ప్రాంతంలో ఓ 20ఏళ్లపైబడిన ఏనుగు మరణించింది. ఘటనాస్థలంలోనే ఆ గజరాజుకు శవపరీక్ష నిర్వహించిన అటవీ సిబ్బంది.. దాని తల భాగం నుంచి బుల్లెట్​ను బయటకు తీశారు. ఈ ఘటనకు సంబంధించి ఇద్దరు స్థానిక రైతులను అదుపులోకి తీసుకున్న పోలీసులు.. వారిని ప్రశ్నిస్తున్నారు.

కోయంబత్తూర్​ అటవీ ప్రాంతం సమీపంలోని సిరుముగై ప్రాంతంలో మరో ఏనుగు మృతదేహం లభించగా.. దాని మరణానికి గల కారణాలు తెలియాల్సి ఉంది.

విద్యుదాఘాతమే కారణమా?

నీలగిరిలోని మసినగిరి అటవీ ప్రాంతంలో మాదుమలైలో ఓ మగ ఏనుగు చనిపోయినట్లు స్థానికులు గుర్తించారు. ఆ గజరాజు.. విద్యుదాఘాతం వల్ల మరణించి ఉంటుందని ప్రాథమిక సమాచారం. అయితే పోస్ట్​మార్టం తరువాతే అసలు కారణాలు తెలుస్తాయని అధికారులు పేర్కొన్నారు.

ఇటీవలే సిరుముగై అడవుల్లో అనారోగ్యం బారినపడ్డ ఓ 20ఏళ్ల మగ ఏనుగుకు చికిత్స అందించారు అటవీశాఖ అధికారులు. ప్రస్తుతం దాని పరిస్థితి మళ్లీ విషమించిందని తెలిపారు.

14 రోజుల్లో 14 గజరాజులు...

కోయంబత్తూర్​ పరిధిలో 14 రోజుల వ్యవధిలోనే 14 ఏనుగులు మరణించినట్లు అటవీశాఖ అధికారులు స్పష్టం చేశారు. ఫలితంగా ఈ దశాబ్దంలో మొత్తం 141 గజరాజులు మృతిచెందినట్టు వివరించారు.

ఇదీ చదవండి:బావిలో పడిన ఏనుగు.. రోజంతా అందులోనే..