ఈ నెల 16న తెరుచుకోనున్న శబరిమల దేవస్థానం నెలవారీ ఐదురోజుల పూజా కార్యక్రమం కోసం శబరిమల దేవస్థానం అక్టోబర్ 16 నుంచి మళ్లీ తెరుచుకోనుంది. ఈ సందర్భంగా ఆలయానికి వచ్చే భక్తులు అనుసరించాల్సిన నిబంధనలపై ట్రావెన్కోర్ దేవస్థానం బోర్డు సమావేశమైంది. అడవుల దారి నుంచి ఈ ఏడాది దర్శనానికి అనుమతించట్లేదని తెలిపింది. ఆ రాష్ట్ర దేవాదాయ శాఖ మంత్రి కడకంపల్లి సురేంద్రన్ అధ్యక్షతన ఈ భేటీ జరిగింది.
కరోనా నేపథ్యంలో..
స్వామి అయ్యప్పన్ రోడ్డు మార్గం నుంచి మాత్రమే సన్నిధానానికి రావాలని ట్రావెన్కోర్ దేవస్థానం బోర్డు సూచించింది. కరోనా నేపథ్యంలో.. మాస్క్లు ధరించి, కొండమార్గాల్లో చేరుకోవడం భక్తులకు ఇబ్బందిగా ఉంటుందనే ఈ నిర్ణయం తీసుకున్నారు అధికారులు.
నెగెటివ్ వచ్చినవారు మాత్రమే..
కొవిడ్ యాంటిజెన్ పరీక్షలో నెగెటివ్ వచ్చిన వారు మాత్రమే స్వామి దర్శనం చేసుకోవాలని దేవస్థానం బోర్డు స్పష్టం చేసింది. అభిషేకం కోసం నెయ్యిని సమర్పించే భక్తులు.. ప్రత్యేక కౌంటర్లో అందజేయాలని తెలిపింది. ప్రసాదాన్ని కూడా అక్కడే తీసుకోవాలని సూచించింది. నిలక్కల్లో భక్తుల్ని పరీక్షించేందుకు ఆరోగ్య కార్యకర్తల బృందం ఉంటుందని తెలిపింది.
"శబరిమల దేవస్థానంలో వలంటీర్, ఆరోగ్య కార్యకర్తలుగా విధులు నిర్వర్తించేవారిని ఆరోగ్యశాఖతో పాటు దేవస్థానం గుర్తిస్తుంది. భక్తులు తప్పనిసరిగా కరోనా నిబంధనలను పాటించాలి. ఈ నెలలో జరిగే తులమ్ మాసమ్ పూజలోనూ ఇవే నియమాలు వర్తిస్తాయి. "
-- ఎన్ విజయకుమార్, ట్రావెన్కోర్ దేవస్థానం బోర్డు సభ్యుడు.
కొవిడ్ ఆరోగ్య నిబంధనలను ఆలయ సిబ్బంది సహా భక్తులు, అధికారులు అందరూ పాటించాల్సిందేనని ఆ రాష్ట్ర పోలీస్ ఛీఫ్ లోక్నాథ్ బెహెరా తెలిపారు.
ఇదీ చూడండి:అయోధ్య రామాలయం ప్రాంతానికి శిలల తరలింపు
