కేంద్ర ఆర్థిక శాఖ తాత్కాలిక మంత్రి పీయూష్ గోయల్ ప్రవేశపెట్టిన మధ్యంతర బడ్జెట్పై పలువురు రాజకీయ నాయకులు, పారిశ్రామిక వేత్తలు స్పందించారు. ఐదేళ్లపాటు దేశాన్ని అసమర్థంగా పాలించి రైతుల బతుకుల్లో సంతోషం లేకుండా చేశారని కాంగ్రెస్ అధ్యక్షులు రాహుల్గాంధీ విమర్శించారు.
మీ అయిదేళ్ల అసమర్థ పాలనలో రైతుల జీవితాలను అస్తవ్యస్తం చేశారు. రోజుకు కేవలం రూ.17 ఇవ్వడం వారి శ్రమను అవమానించడమే.
- రాహుల్గాంధీ, కాంగ్రెస్ అధ్యక్షులు
మధ్యతరగతి, కార్మికుల, రైతుల అంచనాలను అందుకునే విధంగా ఈ బడ్జెట్ ఉంది. రూ. 75 వేల కోట్ల వ్యయంతో ప్రభుత్వం 'ప్రధాన మంత్రి కిసాన్ సమ్మాన్ నిధి' పథకాన్ని అమలు చేయనుంది. 12 కోట్ల మంది ప్రజలు లబ్ధి పొందనున్నారు. ఈ పథకం ద్వారా ఒక్కో రైతుకు రూ.6 వేలు అందించనున్నాం.
-అమిత్ షా, భాజపా జాతీయాధ్యక్షులు
రైతుల, పేదల, వాణిజ్య అభివృద్ధికి తోడ్పడే విధంగా ఎన్నో జాగ్రత్తలు తీసుకొని ప్రవేశపెట్టిన బడ్జెట్ఇది. మధ్యతరగతి ప్రజల కొనుగోలు శక్తిని పెంచే విధంగా బడ్జెట్ ఉందనటంలో ఏ మాత్రం సందేహం లేదు.
-అరుణ్ జైట్లీ, కేంద్ర మంత్రి
విజన్ 2030కి అనుగుణంగా, అందరితో కలిసి, అందరి అభివృద్ధి కోసం అన్న (సబ్కా సాత్, సబ్కా వికాస్) ప్రధాని మోదీ నినాదాన్ని పునరుద్ఘాటించే విధంగా పీయూష్ గోయల్ బడ్జెట్ ఉంది. నవభారతాన్ని నిర్మించాలనుకుంటున్న భాజపా ప్రభుత్వ విలువలకు అనుగుణంగా ఉంది.
-స్మృతి ఇరానీ, కేంద్ర జౌళిశాఖ మంత్రి
దేశంలోని వనరులపై పేదవారికే తొలి అధికారం ఉందన్న కాంగ్రెస్ సిద్ధాంతాన్ని అనుకరించినందుకు తాత్కాలిక ఆర్థిక మంత్రికి నా కృతజ్ఞతలు.
- పి. చిదంబరం, కేంద్ర మాజీ ఆర్థిక మంత్రి
ఎన్నికలకు ముందు ఇలాంటి బడ్జెట్ ప్రవేశపెడతారని ఊహించాను. ఆర్థిక వ్యవస్థకు నష్టం కలగకుండా మధ్యతరగతి ప్రజలు, రైతులకు ఉపశమనం కల్పించినందుకు నా కృతజ్ఞతలు.
-ఆనంద్ మహీంద్రా, మహీంద్రా గ్రూప్ చైర్మన్
