పట్టపగలే బ్యాంక్ దోపిడీ.. కత్తులతో బెదిరించి...

పగటిపూట అందరూ చూస్తుండగానే ఇద్దరు దొంగలు ఓ బ్యాంకును లూఠీ చేసిన ఘటన నవీ ముంబయి కోపర్​ ఖైరానే ప్రాంతంలో జరిగింది. మొత్తం 4.5 లక్షల రూపాయలను దోచుకెళ్లారు దుండగులు. సంబంధిత దృశ్యాలు సీసీటీవీలో రికార్డయ్యాయి.

నవీ ముంబయిలో పట్టపగలే ఇద్దరు దొంగలు బ్యాంకును లూఠీ చేసిన ఘటన ఆలస్యంగా వెలుగులోకి వచ్చింది. మొత్తం రూ. 4.5 లక్షలతో వారు పరారయ్యారు.

కోపర్​ ఖైరానే​ ప్రాంతంలో గురువారం ఇద్దరు దొంగలు సరస్వతీ బ్యాంక్​లోకి చొరబడ్డారు. బ్యాంక్​ సిబ్బంది మెడపై కత్తి పెట్టి.. లాకర్​ నుంచి డబ్బులు దోచుకున్నారు. ఘటనా సమయంలో బ్యాంకులో మొత్తం ఏడుగురు ఉద్యోగులు ఉన్నారు.

30 నుంచి 35 ఏళ్ల మధ్య వయసున్న దొంగలు వారిని గుర్తుపట్టకుండా మాస్క్‌లు, గ్లౌజులు ధరించి ఉన్నట్లు ఉద్యోగులు పోలీసులకు తెలిపారు. సంబంధిత దృశ్యాలు బ్యాంక్​ సీసీటీవీలో రికార్డయ్యాయి. కేసు నమోదు చేసుకున్న పోలీసులు దర్యాప్తు చేస్తున్నారు.

ఇదీ చూడండి:భవనం కూలిన ఘటనలో 9కి మృతుల సంఖ్య