పండగ సీజన్​లో పట్టాలెక్కనున్న మరో 200 రైళ్లు

పండగ సీజన్​లో ప్రయాణికుల రద్దీ అధికంగా ఉంటుంది. నగరాలు, పట్టణాల్లోని జనమంతా ఒకేసారి సొంతూళ్ల బాట పడుతారు. అయితే ఇప్పటి పరిస్థితులు వేరు. కరోనా మహమ్మారి విజృంభిస్తోంది. ఈ నేపథ్యంలో రాకపోకలకు అంతరాయం కలగకుండా కీలక నిర్ణయం తీసుకుంది రైల్వే శాఖ. అదనంగా.. రెండు వందల ప్రత్యేక రైళ్లను నడిపేందుకు సిద్ధమైంది.

పండగల దృష్ట్యా ప్రయాణికుల సౌకర్యార్థం రైల్వే శాఖ చర్యలు తీసుకుంటోంది. అక్టోబర్​ 15 నుంచి నవంబర్​ 30 వరకు 200 ప్రత్యేక రైళ్లను అందుబాటులోకి తీసుకురానున్నట్లు వెల్లడించారు రైల్వే బోర్డు ఛైర్మన్​, సీఈఓ వీకే యాదవ్​. ఆయా ప్రాంతాల్లోని కరోనా పరిస్థితులను గమనించి.. రైళ్ల సేవలు ఉంటాయని ఆయన స్పష్టం చేశారు.

"జోన్ల వారీగా మేనేజర్లతో సమావేశమయ్యాం. ఆయా ప్రాంతాల్లోని కరోనా వ్యాప్తి వివరాలను సేకరించాలని సూచించాం. వాళ్లు ఇచ్చిన నివేదికానుసారం.. పండగ సీజన్​లో రైళ్లను నడిపేందుకు చర్యలు తీసుకుంటాం. మేము 200 రైళ్లు అవసరమవుతాయని అనుకుంటున్నాం. కానీ, ఇది మా అంచనా మాత్రమే. ఇంతకంటే ఎక్కువగా కూడా సేవలు అందించవచ్చు."

--- రైల్వే బోర్డు ఛైర్మన్​, సీఈఓ వీకే యాదవ్

అవసరమైతే అదనంగా క్లోన్​ రైళ్లు..

కరోనా కారణంగా క్లోన్​ రైళ్లలో 60 శాతం మాత్రమే ఆక్యుపెన్సీ ఉండేలా ఏర్పాట్లు చేస్తామని వీకే యాదవ్​ తెలిపారు.

"ఓ సాఫ్ట్​వేర్​​ ఆధారంగా మేము ప్రతీ ఉదయం క్లోన్​ రైళ్ల రాకపోకలను పరిశీలిస్తున్నాం. ఎక్కడైనా క్లోన్ రైలు పూర్తిగా నిండినట్లయితే అదనంగా మరో రైలును ఏర్పాటు చేస్తాం" అని అన్నారు యాదవ్​.

కొవిడ్​ మహమ్మారి వల్ల అన్ని సాధారణ రైళ్లను మార్చి నుంచి రైల్వే శాఖ నిలిపివేసింది. ఆ తర్వాత వివిధ ప్రాంతాల నుంచి దిల్లీని కలిపే 15 ప్రీమియం రాజధాని రైళ్ల సేవలను మే 12న ప్రారంభించింది. జూన్​ 1 నుంచి దూర ప్రాంతాలకు 100 రైళ్లను.. సెప్టెంబర్​ 12 నుంచి మరో 80 ట్రైన్స్​ను నడుపుతోంది.

ఇదీ చూడండి:'కొండచిలువ'ను తరిమి కుక్కను కాపాడి..!