ఆర్​జేడీ హామీలు: 10లక్షల ఉద్యోగాలు- రుణ మాఫీ

బిహార్​ ఎన్నికలు సమీపిస్తున్న తరుణంలో ఆర్​జేడీ పార్టీ మేనిఫెస్టోను విడుదల చేశారు ఆ పార్టీ నేత తేజస్వీ యాదవ్​. తాము అధికారంలోకి వచ్చిన అనంతరం 10లక్షల ఉద్యోగాలిస్తామని.. రైతుల రుణాలు మాఫీ చేస్తామని హామీనిచ్చారు యాదవ్​.

తాము అధికారంలోకి వస్తే బిహార్ ప్రజలకు 10లక్షల ఉద్యోగాలిస్తామని ఆర్​జేడీ నేత, మహాకూటమి సీఎం అభ్యర్థి తేజస్వీ యాదవ్​ హామీ ఇచ్చారు. రైతుల రుణాలు మాఫీ చేస్తామన్నారు. రానున్న అసెంబ్లీ ఎన్నికల కోసం.. పట్నాలో పార్టీ మేనిఫెస్టోను విడుదల చేసిన నేపథ్యంలో ఈ వ్యాఖ్యలు చేశారు.

ఆర్​జేడీ హామీలు...

• రాష్ట్రంలో ఉన్న 17 సమస్యలకు ప్రాధాన్యం
• 10లక్షల ఉద్యోగాలపై తొలి కేబినెట్​ సమావేశంలోనే నిర్ణయం
• పనికి తగ్గ వేతనం
• కాంట్రాక్ట్​ ఉద్యోగులను తిరిగి విధుల్లోకి చేర్చుకోవడం
• ప్రైవేటీకరణకు స్వస్తి
• అన్ని నీటిపారుదల పంపులను సౌర పంపులుగా మార్చడం
• బిహార్​లో క్రీడా విశ్వవిద్యాలయం
• ప్రతి డివిజన్​లోనూ పెద్ద స్టేడియం
• ప్రభుత్వ ఉద్యోగులకు ముందస్తు పింఛను వ్యవస్థ
• ప్రత్యేక ఆర్థిక జోన్ల ఏర్పాటు
• విద్యుత్​ రేట్లలో కోత
• రైతు రుణాల మాఫీ

కాంగ్రెస్​,సీపీఐ,సీపీఎం​తో కలిసి బిహార్​ ఎన్నికల్లో 'మహాకూటమి'గా బరిలో దిగనుంది ఆర్​జేడీ. మహాకూటమికి సంబంధించిన మేనిఫెస్టోను ఇప్పటికే విడుదల చేశారు.

243 అసెంబ్లీ స్థానాలకు మూడు దశల్లో ఎన్నికలు జరగనున్నాయి. ఈ నెల 28, వచ్చే నెల 3,7 తేదీల్లో ప్రజలు తమ ఓటు హక్కును వినియోగించుకోనున్నారు. అదే నెల 10న ఫలితాలు వెలువడనున్నాయి.

ఇవీ చూడండి:-