కరోనా వైరస్ వ్యాప్తికి పసుపుతో కళ్లెం పడేనా?

ఆరోగ్య సిబ్బందికి కరోనా వైరస్​ నుంచి రక్షణ కల్పించేందుకు కేరళలోని మహాత్మాగాంధీ విశ్వవిద్యాలయం పరిశోధకులు కృషి చేస్తున్నారు. పసుపులోని కర్కమిన్​ అనే పదార్థం సాయంతో పీపీఈలను శుభ్రం చేసే విధానాలపై అధ్యయనం చేస్తున్నారు. ​వ్యాక్సిన్​ తయారీపైనా దృష్టి సారించారు.

కరోనా వైరస్ వ్యాధికి వ్యాక్సిన్​, మందులను కనుగొనేందుకు ప్రపంచవ్యాప్తంగా పరిశోధకులు తీవ్రంగా శ్రమిస్తున్నారు. కేరళలోనూ కరోనా వ్యాప్తిని నియంత్రించే పద్ధతులు, వ్యాక్సిన్ల అభివృద్ధిపై పరిశోధనలు చేస్తున్నారు.

కొట్టాయంలోని మహాత్మాగాంధీ విశ్వవిద్యాలయ పరిశోధకులు పలు అంశాలపై దృష్టి సారించారు. ఆరోగ్య సిబ్బంది ధరించే వ్యక్తిగత సంరక్షణ పరికరాల (పీపీఈ)ను శుభ్రం చేసే విధానాలపై పరిశోధిస్తున్నారు.

విశ్వవిద్యాలయ ఉపకులపతి డాక్టర్​ సాబు థామస్​ నేతృత్వంలో ఈ పరిశోధనలు సాగుతున్నాయి. కరోనాను పసుపులోని కర్కమిన్​ అనే పదార్థం నియంత్రించగలదని ఆశిస్తున్నారు. ఆ దిశగా మూడు ప్రాజెక్టులపై కృషి చేస్తున్నారు.

ఈ మిశ్రమాల పూతతో..

కర్కమిన్​, టైటానియం డైయాక్సైడ్​తో మరిన్ని పదార్థాల మిశ్రమంతో పీపీఈలు, మాస్కులకు అతి సూక్ష్మంగా పూత పూసి.. తద్వారా కరోనా వ్యాప్తిని నియంత్రించేందుకు పరిశోధిస్తున్నారు.

వారి సహకారంతో..

కొవిడ్- 19 బాధితుల నుంచి సేకరించిన యాంటీబాడీలతో వ్యాక్సిన్​ తయారీకి ప్రయత్నిస్తున్నట్లు సాబు తెలిపారు. వీటికోసం మూడేళ్ల సమయంతోపాటు రూ.3 కోట్లు ఖర్చవుతుందని అంచనా వేస్తున్నారు. ఈ పరిశోధనలన్నింటికీ జాతీయ, అంతర్జాతీయ యూనివర్సిటీలు, పరిశోధనా కేంద్రాలు సహకారం అందిస్తున్నాయని తెలిపారు.