సుజిత్​ కోసం ప్రార్థనలు.... నిర్విరామంగా సహాయక చర్యలు

తిరుచిరాపల్లి నడుకట్టుపట్టిలో బోరుబావిలో పడిన చిన్నారి సుజిత్​ విల్సన్​ను రక్షించేందుకు శాయశక్తులా ప్రయత్నిస్తున్నామని తెలిపింది తమిళనాడు ప్రభుత్వం. ఏ ఒక్క అవకాశాన్ని వదులుకోమని... సహాయక చర్యలు చివరివరకూ కొనసాగుతాయని స్పష్టం చేశారు అధికారులు. బోరుబావికి సమాంతరంగా అత్యాధునిక పరికరాలు ఉపయోగించి.. మరో గొయ్యి తవ్వుతున్నారు. బాలుడు క్షేమంగా బయటపడాలని సినీ, రాజకీయ ప్రముఖులు సహా అందరూ ప్రార్థిస్తున్నారు.

తమిళనాడు తిరుచిరాపల్లిలో బోరుబావిలో పడిన చిన్నారిని రక్షించేందుకు సహాయక బృందాలు తీవ్రంగా శ్రమిస్తున్నాయి. సహాయక చర్యలు కొనసాగిస్తామని... చిన్నారిని కాపాడే ఏ అవకాశాన్ని వదులుకోమని రెవెన్యూ శాఖ కమిషనర్​ రాధాకృష్ణన్​ స్పష్టం చేశారు. బాలుడి ప్రాణాలపై ఆశలు వదులుకోమని తల్లిదండ్రులకు ఎలాంటి తప్పుడు సమాచారం ఇవ్వమన్నారు. సుజిత్​ విల్సన్​ను బయటకు తీసుకొచ్చేందుకు అత్యాధునిక పరికరాలు వాడుతున్నట్లు స్పష్టం చేశారు.

''చిన్నారిని కాపాడేందుకు చేయాల్సినవన్నీ చేస్తున్నాం. బాలుడు ఒక ప్రదేశంలో చిక్కుకున్నాడు. మరింత లోపలికి వెళ్లలేడు. అతనిపై ఏ మాత్రం ప్రభావం పడకుండా క్షేమంగా బయటకు తీసుకురావాలనుకుంటున్నాం.''

- రాధాకృష్ణన్​, తమిళనాడు రెవెన్యూ శాఖ కమిషనర్​

బాలుడ్ని మరో వ్యక్తి చేరుకునే విధంగా బోరుబావికి సమాంతరంగా మరో బోరుబావి తవ్వుతున్నారు. ఇప్పటివరకు 40 అడుగుల వరకు గొయ్యి తీశారు. సహాయక చర్యలను దగ్గరుండి పర్యవేక్షిస్తున్నారు రాష్ట్ర ఆరోగ్య మంత్రి విజయభాస్కర్​.

బాలుడు క్షేమంగా బయటపడాలని సామాన్య ప్రజలు సహా... సినీ, రాజకీయ ప్రముఖులు ప్రార్థిస్తున్నారు. ఈ నెల 25న ఇంటిముందు ఆడుకుంటున్న విల్సన్.. ప్రమాదవశాత్తు బోరుబావిలో పడిపోయాడు. అప్పటి నుంచి సహాయక బృందాలు శ్రమిస్తున్నాయి.

ఇదీ చూడండి:దంగల్​ 2.0 తీసేందుకు మరో యదార్థ కథ సిద్ధం!