బోరుబావిలో రెండున్నరేళ్ల బాలుడు.. రంగంలోకి ఐఐటీ​

తమిళనాడు త్రిచి జిల్లాలో ప్రమాదవశాత్తు ఓ బాలుడు బోరుబావిలో పడిపోయాడు. చిన్నారిని రక్షించేందుకు అగ్నిమాపక దళంతో పాటు ఐఐటీ మద్రాస్​ రంగంలోకి దిగి సహాయక చర్యలు ముమ్మరం చేసింది.

రెండున్నరేళ్ల చిన్నారి ప్రమాదవశాత్తు బోరుబావిలో పడిన ఘటన తమిళనాడులోని త్రిచి జిల్లాలో చోటుచేసుకుంది. బాలుడిని రక్షించేందుకు అగ్నిమాపక దళం, ప్రభుత్వ అధికారులు రంగంలోకి దిగారు. ఐఐటీ మద్రాస్​ తయారు చేసిన ప్రత్యేక పరికరంతో ఆ బాలుడిని రక్షించే ప్రయత్నం చేస్తున్నారు అధికారులు. అయితే.. తొలుత 30 అడుగుల లోతులో ఉన్నట్లు భావిస్తున్న చిన్నారి.. సుమారు 70 అడుగుల లోతుకు పడిపోయాడు.

మనపరాయ్​కి చెందిన సుజిత్​.. ఇంటి సమీపంలో ఆడుకుంటూ ప్రమాదవశాత్తు బోరుబావిలో పడిపోయాడు. గమనించిన స్థానికులు బాలుడిని రక్షించేందుకు ప్రయత్నం చేశారు. అనంతరం అధికారులకు సమాచారం అందించారు. ఘటనా స్థలానికి చేరుకున్న అగ్నిమాపక సిబ్బంది సుజిత్​ను రక్షించేందుకు తీవ్రంగా శ్రమిస్తున్నారు.

త్రిచి జిల్లా పాలనాధికారి సివరాసు, ముగ్గురు రాష్ట్ర మంత్రులు ఘటనాస్థలానికి చేరుకుని సహాయక చర్యలను పర్యవేక్షించారు. బాలుడు క్షేమంగా బయటకు రావాలని ఆకాంక్షిస్తున్నారు.

ఇదీ చూడండి: దశాబ్దం తర్వాత 'హరియాణా' చరిత్ర పునరావృతం