అంబానీకి ఫ్రాన్స్​లో పన్ను మినహాయింపు !

రఫేల్​ ఒప్పందం అనంతరం ఫ్రాన్స్​లో అనిల్​ అంబానీకి చెందిన సంస్థకు 143.7 మిలియన్​ యూరోల పన్ను మినహాయింపు లభించినట్లు 'లీ మాండే' అనే పత్రిక ఓ కథనాన్ని ప్రచురించింది. మోదీ వల్లే ఇదంతా సాధ్యమైందని కాంగ్రెస్​ పార్టీ విమర్శించింది.

రఫేల్​పై మరో కొత్త వివాదం చెలరేగింది. రఫేల్ ఒప్పందం అనంతరం కొన్ని నెలల్లోనే ఫ్రాన్స్​లో అనిల్​ అంబానీ సంస్థ భారీగా పన్ను మినహాయింపు పొందినట్లు 'లీ మాండే' అనే ఫ్రెంచ్​ పత్రిక ఓ కథనాన్ని ప్రచురించింది.

ఈ కథనం ప్రకారం... 'రిలయన్స్​ ప్లాగ్​ అట్లాంటిక్​ ఫ్రాన్స్​' అనే సంస్థ చెల్లించాల్సిన వాస్తవ పన్ను 151 మిలియన్​ యూరోలు. దీనికి బదులుగా 7.3 మిలియన్​ యూరోలను మాత్రమే ప్రభుత్వం వసూలు చేసింది. రిలయన్స్​ ఫ్లాగ్​కు ఆ దేశంలో కేబుల్​ నెట్​వర్క్​తో పాటు టెలికం మౌలిక వసతుల సంస్థలు ఉన్నాయి.

ఖండించిన రిలయన్స్​...

ఈ ఆరోపణలను రిలయన్స్​ కమ్యూనికేషన్స్​ ఖండించింది. ఆ దేశంలో అన్ని సంస్థలు పొందినట్లే చట్టపరంగా సబ్సిడీ పొందినట్లు తెలిపింది.

మోదీ దయనే అంతా...

అంబానీ సంస్థకు పన్ను సబ్సిడీపై కాంగ్రెస్​ పార్టీ విమర్శల వర్షం కురిపించింది. మోదీ వల్లే ఇది సాధ్యమైందని ఆరోపించింది. ఈ మొత్తం వ్యవహారంలో మోదీ మధ్యవర్తిగా వ్యవహరించారని ఎద్దేవా చేశారు కాంగ్రెస్​ పార్టీ అధికార ప్రతినిధి రణ్​దీప్​ సుర్జేవాలా.