మూడున్నర గంటల్లోనే 7 బిల్లులకు ఆమోదం

రికార్డు స్థాయిలో మూడున్నర గంటల్లోనే 7 కీలక బిల్లులకు ఆమోదం తెలిపింది రాజ్యసభ. నిత్యావసర వస్తువుల సవరణ బిల్లు, బ్యాంకింగ్​ నియంత్రణ సవరణ బిల్లు సహా 7 కీలక బిల్లులు ఒక్కరోజే పార్లమెంటు గడప దాటాయి.

రాజ్యసభలో మంగళవారం మూడున్నర గంటల్లోనే 7 కీలక బిల్లులకు ఆమోదం లభించింది. నిత్యావసర వస్తువుల సవరణ బిల్లు, బ్యాంకింగ్​ రెగ్యులేషన్​ సవరణ బిల్లు సహా.. మొత్తం 7 బిల్లులను ఆమోదించింది పెద్దల సభ.

నిత్యావసర వస్తువుల సవరణ బిల్లును మూజువాణి ఓటుతో ఆమోదించింది. ఈ బిల్లు చట్టంగా మారితే.. ఉల్లి, నూనెలు, పప్పులు, తృణధాన్యాలను నిత్యావసర వస్తువుల జాబితాను తొలగించవచ్చు. ఈ బిల్లును లోక్‌సభ ఈ నెల 15న ఆమోదించింది.

బ్యాంకింగ్​ రెగ్యులేషన్​ సవరణ బిల్లును కూడా రాజ్యసభ ఆమోదించింది. దీని ద్వారా సహకార బ్యాంకులను ఆర్​బీఐ పర్యవేక్షణలోకి తీసుకురావచ్చు.

చాలా బిల్లులను పెద్దగా సభ్యుల భాగస్వామ్యం లేకుండానే ఆమోదించింది ఎగువసభ. మంత్రుల వివరణ కూడా త్వరగానే ముగిసింది.

ఎంపీలపై సస్పెన్షన్​ వేటును నిరసిస్తూ.. అంతకుముందు కాంగ్రెస్​, వామపక్షాలు, తృణమూల్​, సమాజ్​వాదీ, ఎన్​సీపీ సభ్యులు సభ నుంచి వాకౌట్​ చేశారు.

ఎగువసభ ఆమోదం పొందిన బిల్లులు..

• కొత్తగా స్థాపించిన ఐదు ఐఐఐటీలను జాతీయ ప్రాముఖ్యం కలిగిన సంస్థలుగా ప్రకటించే బిల్లు
• నిత్యావసర వస్తువుల సవరణ బిల్లు
• బ్యాంకింగ్​ రెగ్యులేషన్​ సవరణ బిల్లు
• జాతీయ ఫోరెన్సిక్​ సైన్సెస్​ యూనివర్సిటీ బిల్లు
• రాష్ట్రీయ రక్ష యూనివర్సిటీ బిల్లు
• టాక్సేషన్​ అండ్​ అదర్​ లాస్​ బిల్లు-2020

కరోనా వైరస్​ నేపథ్యంలో.. పన్ను, జీఎస్​టీ చెల్లింపులు, పన్ను దాఖలు కాలపరిమితిని సడలించే ఉద్దేశంతో ఈ బిల్లును రూపొందించారు.

• కంపెనీల చట్ట సవరణ బిల్లు-2020

ఈ బిల్లుతో వేర్వేరు అపరాధాలను నేరాల జాబితా నుంచి తప్పించవచ్చు.

ఈ ఏడు బిల్లులూ.. ఇది వరకే లోక్​సభలో గట్టెక్కాయి. ఇప్పుడు వాటిని రాష్ట్రపతి ఆమోదం కోసం పంపుతారు. ఆయన అంగీకారం తెలిపితే.. చట్టంగా మారుతాయి.

బిల్లుల ఆమోదం కోసం మంగళవారం సభా సమయాన్ని మరో గంటకుపైగా పొడిగించారు ఛైర్మన్ వెంకయ్యనాయుడు​.

కేంద్ర ప్రభుత్వం తీసుకువచ్చిన రెండు వ్యవసాయ సంబంధిత బిల్లులు రాజ్యసభలో ఆదివారం విపక్షాల ఆందోళనల మధ్య ఆమోదం పొందాయి. బిల్లుల ఆమోదం విషయంలో అప్రజాస్వామికంగా వ్యవహరించారని ఆరోపిస్తూ పలువురు ప్రతిపక్ష నాయకులు డిప్యూటీ ఛైర్మన్‌ పోడియం వద్ద అనుచితంగా ప్రవర్తించారు. దీంతో 8 మంది ఎంపీలపై ఛైర్మన్‌ సస్పెన్షన్‌ వేటు వేశారు. వ్యతిరేకంగా ప్రతిపక్షాలు మంగళవారం సభ నుంచి వాకౌట్‌ చేశాయి. ఆ తర్వాతే బిల్లులను ఆమోదించుకుంది కేంద్రం.

ఇదీ చూడండి:'ఆ ఎంపీలు క్షమాపణ చెబితేనే వేటుపై పునరాలోచన'