వన్యప్రాణుల సంరక్షకుడిగా మాజీ సైనికుడు

కేరళలో ఏనుగు మృతిపై దేశమంతా విచారం వ్యక్తం చేసింది. ఈ దారుణం చేసినవారిపై మరికొందరు ఆగ్రహించారు. రాజస్థాన్​లోని ఓ మాజీ జవాను వన్యప్రాణులకే తన జీవితాన్ని అంకితం చేశాడు. వన్యప్రాణుల సంరక్షణకు ఆయన చేసిన కృషికి ఉపరాష్ట్రపతి వెంకయ్యనాయుడు చేతుల మీదుగా 'ఎర్త్​ హీరో' పురస్కారాన్ని అందుకున్నాడు. మరి ఆయన కథేంటో చూద్దామా..

కేరళలో మే 27న జరిగిన గర్భిణీ ఏనుగు హత్య చాలా మందిని కలచివేసింది. మూగజీవంపై ఇంత అమానుషంగా ప్రవర్తించటం మానవత్వానికే మచ్చతెచ్చింది. అయితే దీనికి భిన్నంగా కొన్నేళ్లుగా వన్యప్రాణుల సంరక్షణ కోసం పాటుపడుతున్నాడు రాజస్థాన్​కు చెందిన వ్యక్తి. ఐదేళ్ల పాటు సీఆర్​పీఎఫ్​ జవానుగా పనిచేసిన పీరారామ్​ ధాయల్​.. తన మిగిలిన జీవితాన్ని వన్యప్రాణులకు అంకితం చేశాడు.

జాలోర్​ జిల్లా దేవరా గ్రామానికి చెందిన ధాయల్​.. 1990లో ఉద్యోగాన్ని వదిలేశాడు. అనంతరం మూగజీవాల సంరక్షణ కోసం పాటుపడాలని నిర్ణయించుకున్నాడు. గాయపడిన మూగజీవులను రక్షించి, చికిత్స అందించేవాడు. అవి కోలుకున్న తర్వాత అడవిలో వదిలిపెడతాడు. ఇలా కొన్నేళ్లుగా 900 మూగజీవాలకు పైగా రక్షించాడు పీరారామ్​. 2003 నుంచి ఈ పనిని చేస్తున్నాడు.

గార్డెన్​ పెంపకం..

ధాయల్​ 2009లో గ్రామస్థుల సాయంతో జిల్లాలోని హైవేను ఆనుకుని ఉన్న ధామ్నాలో 6,000 మొక్కలు నాటాడు. దీనికి 'అమృత దేవి గార్డెన్​'గా నామకరణం చేశాడు. అప్పటి నుంచి ఇక్కడే జింకలు, కుందేళ్లు, దుప్పి, కోతులు, నెమళ్లకు చికిత్స అందిస్తున్నాడు. ప్రస్తుతం సుమారు 50 జింకలు గార్డెన్​లో ఉన్నట్లు ధాయల్ చెబుతున్నాడు.

ఫిర్యాదులతో ఆటంకం..

ఆరంభంలో చాలా సమస్యలు ఎదురయ్యాయని పీరారామ్​​ చెప్పుకొచ్చాడు. "తాను అక్రమంగా ఆ భూమిని ఆక్రమించుకున్నానని సంబంధిత అధికారులకు ఫిర్యాదు చేసేవారు కొంతమంది గ్రామస్థులు. ఫలితంగా ఆ స్థలాన్ని ఖాళీ చేయాలని అధికారులు నన్ను హెచ్చరించారు. ఆ వివాదం వల్ల ఆ గార్డెన్​, వన్యప్రాణులను అధికారులకు అప్పగించాను." అని తెలిపాడు.

5 రోజులు వాటి బాగోగులు చూసిన తర్వాత తిరిగి ఆ గార్డెన్​ను పీరారామ్​కే అప్పగించారు అధికారులు. 2017లో గార్డెన్​లోని జంతువులను చూసుకోవడానికి అటవీశాఖ అధికారులు 8మంది సిబ్బందిని నియమించారు.

పురస్కారాలు.. ​

పీరారామ్​ కృషిని గుర్తించిన ప్రభుత్వం ఎర్త్​ హీరో పురస్కారానికి ఎంపిక చేసింది. ఉపరాష్ట్రపతి వెంకయ్యనాయుడు చేతుల మీదగా ఎర్త్​ హీరో- 2018 అవార్డును పొందాడు పీరారామ్​. 2018-2019లో 'వైల్డ్​లైఫ్​ కన్జర్వేషన్​'​ అవార్డు కూడా అందుకున్నాడు​.

ఇదీచూడండి:ఆ రాష్ట్రంలో మరో ఏనుగు గాథ.!