ముంబయిపై మరోసారి వరుణుడి పంజా

మహారాష్ట్ర రాజధాని ముంబయిపై వరుణుడు మళ్లీ ప్రతాపం చూపిస్తున్నాడు. ఉదయం నుంచి కురుస్తున్న వానలతో నగరంలోని వీధులన్నీ తడిసి ముద్దయ్యాయి. రైలు, రోడ్డు, విమాన సేవలకు అంతరాయం ఏర్పడింది.

దేశ ఆర్థిక రాజధాని ముంబయిని మళ్లీ భారీ వర్షాలు ముంచెత్తుతున్నాయి. నగరంలోని వీధుల్లో వరద నీరు చేరింది. చాలా చోట్ల ట్రాఫిక్‌ స్తంభించిపోయింది. రైలు, విమాన సేవలకు అంతరాయం ఏర్పడింది. ఉదయాన్నే పాఠశాలలకు, ఉద్యోగాలకు వెళ్లేవారు తీవ్ర ఇబ్బందులు ఎదుర్కొన్నారు.

రాకపోకలకు అంతరాయం

మేఘాలు దట్టంగా ఉండటం వల్ల విమానాల రాకపోకలు స్తంభించాయి. ఛత్రపతి శివాజీ అంతర్జాతీయ విమానాశ్రయంలో సుమారు 20 నిమిషాల పాటు రన్​వే మూసివేశారు. 3 విమానాలను దారి మళ్లించారు. ఘట్​కోపార్​, కంజూర్​మార్గ్, సియాన్​ రైల్వే స్టేషన్ల పరిధిలో పట్టాలపై భారీగా నీరు చేరింది. ఫలితంగా లోకల్​ ట్రైన్​లు నెమ్మదిగా నడుస్తున్నాయి.

నవీ ముంబయిలో కురిసిన భారీ వర్షంతో రహదారులన్నీ పూర్తిగా జలమయం అయ్యాయి. వరద నీటి మట్టం రెండు అడుగులకు చేరుకుంది.

భారీ వర్షాలకు అవకాశం

మరి కొన్నిగంటల్లో ముంబయితో పాటు మహారాష్ట్రలోని పలు చోట్ల భారీ వర్షాలు కురుస్తాయని వాతావరణ శాఖ హెచ్చరించింది. ముంబయితో పాటు ఠాణే, పాల్​ఘాట్, రాయిగడ్​ జిల్లాల్లో భారీ నుంచి అతిభారీ వర్షాలు కురిసే అవకాశముందని తెలిపింది.

ఇదీ చూడండి: నాసిక్​లో భారీ వర్షాలతో ఉప్పొంగిన గోదావరి