లాక్​డౌన్​ వేళ.. 30లక్షల మందికి రైల్వేశాఖ ఆహారం!

దేశవ్యాప్తంగా లాక్​డౌన్​ కారణంగా నిరుపేదలు, ఆశ్రయం లేని వారికి ఆహారం కరవైంది. ఈ నేపథ్యంలో ఆకలితో ఉన్న వారికి భోజనం పెట్టే దిశగా కృషి చేసింది రైల్వేశాఖ. 30 లక్షల ఆహార ప్యాకెట్లను అవసరమైన వారికి అందించింది. ఈ ఆహారాన్ని దేశవ్యాప్తంగా ఉన్న ఐఆర్​సీటీసీ వంటశాలల్లో సిద్ధం చేసినట్లు తెలిపింది. ఆర్​పీఎఫ్​ అధికారులు, స్వచ్ఛంద సంస్థల సహకారంతో ఈ భోజనాన్ని నిరుపేదలకు అందించినట్లు పేర్కొంది.

దేశ వ్యాప్తంగా లాక్​డౌన్​తో షాపులు నడవక.. జనం బయటకు రాక నిరుపేదలు, వలసకార్మికులు, నిరాశ్రయులకు ఆహారం కరవైంది. ఈ నేపథ్యంలో అవసరంలో ఉన్న వారి ఆకలి తీర్చింది రైల్వే శాఖ. ఇప్పటి వరకు 30 లక్షల ఆహార ప్యాకెట్లను ఆయా ప్రాంతాల్లోని పేదలకు అందించింది. ఏప్రిల్​ 20 వరకు 20 లక్షల ప్యాకెట్లను అందించగా.. కేవలం 10 రోజుల్లోనే 10 లక్షల ప్యాకెట్లను పంచింది. ఈ మేరకు రైల్వే శాఖ వర్గాలు ప్రకటన విడుదల చేశాయి.

"కరోనా వైరస్​ వల్ల అసాధారణ పరిస్థితులు నెలకొన్నాయి. అంతేకాకుండా పెద్ద సంఖ్యలో ప్రజలు ఆకలితో అలమటిస్తున్నారు. లాక్​డౌన్​ కారణంగా రోజువారీ కూలీలు, వలస కార్మికులు, నిరుపేదలు, నిరాశ్రయులు దుర్భర జీవితాన్ని గడుపుతున్నారు. దీంతో ఆర్​పీఎఫ్​ అధికారులు, స్వచ్ఛంద సంస్థల సహకారంతో ఐఆర్​సీటీసీ వంటశాలల్లో వండిన ఆహారాన్ని.. ప్యాకెట్లలో సిద్ధం చేసి నిరుపేదలకు అందించాం. ఆహారం పంపిణీ చేసేటప్పుడు భౌతిక దూరం, పరిశుభ్రతను పాటించాం."

-రైల్వే ప్రకటన.

రైల్వేస్టేషన్ల చుట్టుపక్కల ప్రాంతాల్లో ఉన్న నిరుపేదలకు ఆహరం అందించినట్లు పేర్కొన్నారు అధికారులు. ఆర్​పీఎఫ్​, జీఆర్​పీ, ఆయా జోన్ల వాణిజ్య విభాగాలు, రాష్ట్ర ప్రభుత్వాలు, జిల్లా పాలనాధికారులు, స్వచ్ఛంద సంస్థల సహకారంతో ఈ కార్యక్రమం కొనసాగుతుందని చెప్పారు.

దేశంలోని అన్ని ఐఆర్​సీటీసీ వంటశాలల్లో ఆహారం వండినట్లు వివరించారు. ఐఆర్​సీటీసీ 17.17 లక్షల ఆహార ప్యాకెట్లను అందించగా, ఆర్​పీఎఫ్​ 5.18 లక్షలు, రైల్వే శాఖలోని వివిధ విభాగాలు 2.53 లక్షలు, స్వచ్ఛంద సంస్థలు 5.60 లక్షల భోజన ప్యాకెట్లను అందించినట్లు అధికారులు తెలిపారు.