'మాస్క్​ల ఎగుమతులకు ఎందుకు అనుమతిచ్చారు?'

కరోనాను కట్టడి చేసేందుకు ఉపయోగపడే మాస్క్​లు, వెంటిలేటర్ల ఎగుమతుల నిషేధ విషయంలో కేంద్రం ఆలస్యంగా అప్రమత్తమైందన్నారు కాంగ్రెస్​ నేత రాహుల్​ గాంధీ. వైద్య పరికరాలు తగినన్ని నిల్వ చేయకుండా ఎందుకు అలసత్వం వహించారని ట్విట్టర్​ వేదికగా ప్రశ్నించారు.

కరోనాను అరికట్టేందుకు అవసరమైన వెంటిలేటర్లు, మాస్క్​లను విదేశాలకు ఎగుమతి చేయకుండా నిషేధించే నిర్ణయాన్ని తీసుకోవటంలో కేంద్ర ప్రభుత్వం ఆలస్యం చేసిందని కాంగ్రెస్​ నేత రాహుల్ గాంధీ మండిపడ్డారు. మాస్క్​లు, ఇతర వైద్య పరికరాల ఎగుమతులను నిషేధిస్తూ మార్చి 19న కేంద్ర ప్రభుత్వం నిర్ణయం తీసుకుంది. ఈ నేపథ్యంలో.. మోదీపై ఆగ్రహం వ్యక్తం చేశారు రాహుల్​.

రాహుల్​గాంధీ ట్విట్​

"ప్రధాన మంత్రి గారు.. ప్రపంచ ఆరోగ్య సంస్థ (డబ్ల్యూహెచ్​ఓ) సూచించినట్లుగా వెంటిలేటర్లు, సర్జికల్​ మాస్క్​లను తగినంత నిల్వ చేయకుండా.. మార్చి 19 వరకు ఇతర దేశాలకు ఎగుమతి చేయటానికి ఎందుకు అనుమతి ఇచ్చారు? అలాంటి చర్యలను ఎందుకు ప్రోత్సహించారు? అది నేరపూరిత చర్య కాదా?"

-రాహుల్​గాంధీ, కాంగ్రెస్​ నేత.

ఇదీ చూడండి:కరోనా కలవరం: ఇరాన్​లో 1,800 మందికి పైగా మృత్యువాత