నిరసనకారులకు మద్దతుగా అసోంలో రాహుల్​ పర్యటన

కాంగ్రెస్​ అగ్రనేత రాహుల్​ గాంధీ.. నేడు అసోంలో పర్యటించనున్నారు. పౌరసత్వ సవరణ చట్టానికి వ్యతిరేకంగా జరుగుతున్న ఆందోళనలకు పార్టీ తరఫున మద్దతు ప్రకటించనున్నారు. నిరసనకారులకు సంఘీభావం తెలపనున్నారు. అనంతరం.. కాంగ్రెస్​ తలపెట్టిన భారీ ర్యాలీలో పాల్గొననున్నారు రాహుల్​.

పౌరసత్వ సవరణ చట్టం వ్యతిరేక ఆందోళనలకు మద్దతుగా కాంగ్రెస్ అగ్రనేత రాహుల్‌గాంధీ ఇవాళ అసోంలో పర్యటించనున్నారు. నిరసనకారులకు పార్టీ తరఫున రాహుల్​ గాంధీ.. సంఘీభావం తెలపనున్నట్లు అసోం కాంగ్రెస్‌ ఇన్‌ఛార్జి హరీశ్​ రావత్ చెప్పారు. పౌరసత్వ చట్టానికి వ్యతిరేకంగా గువాహటిలో కాంగ్రెస్ తలపెట్టిన భారీ ర్యాలీలో పాల్గొననున్న రాహుల్.. పార్టీ కార్యకర్తలను ఉద్దేశించి ప్రసంగించనున్నారు.

అసోంలో పౌర అల్లర్లలో మరణించిన ఐదుగురు నిరసనకారులకు కాంగ్రెస్​ పార్టీ తరఫున నివాళి అర్పించనున్నారు. పోలీసు కాల్పుల్లో మృతి చెందిన మరో ఇద్దరు బాధితుల కుటుంబ సభ్యులను రాహుల్‌ పరామర్శించనున్నారు.

నిరసనల నడుమ...

పౌరసత్వ సవరణ చట్టానికి వ్యతిరేకంగా ఈశాన్య రాష్ట్రం అసోంలో ఆందోళనలు కొనసాగుతూనే ఉన్నాయి. ఇటీవల ఉత్తర్​ప్రదేశ్​లో పౌర ఆందోళనల్లో మృతి చెందిన వారి కుటుంబసభ్యులను పరామర్శించేందుకు వెళ్లిన రాహుల్​, ప్రియాంకను మేరఠ్​లో పోలీసులు అడ్డుకున్నారు. ఈ నేపథ్యంలో రాహుల్​ గాంధీ పర్యటన ప్రాధాన్యం సంతరించుకుంది.