'నిరుద్యోగులకు ఉపాధి కల్పించలేని స్థితిలో దేశం'

నిరుద్యోగులకు ఉపాధి కల్పించలేని స్థితికి దేశం​ చేరుకుందని ఆవేదన వ్యక్తం చేశారు కాంగ్రెస్​ నేత రాహుల్​ గాంధీ. ఒక ఉద్యోగానికి 1000 మంది నిరుద్యోగులు ఉన్నారని, దేశాన్ని ఏం చేశారంటూ కేంద్ర ప్రభుత్వాన్ని ప్రశ్నించారు.

దేశంలో పెరుగుతోన్న నిరుద్యోగ సమస్యపై కేంద్ర ప్రభుత్వాన్ని మరోసారి విమర్శించారు కాంగ్రెస్​ నేత రాహుల్​ గాంధీ. ఒక ఉద్యోగానికి 1000 మంది నిరుద్యోగులు ఉన్నారంటూ ట్విట్టర్​ వేదికగా ధ్వజమెత్తారు.

దేశంలో నిరుద్యోగం పెరుగిపోతుందన్న మీడియా కథనాన్ని ఉటంకిస్తూ ట్వీట్​ చేశారు. దేశాన్ని ఏం చేశారంటూ ప్రభుత్వాన్ని నిలదీశారు. దేశం.. తన చరిత్రలో మొట్టమొదటి సారిగా నిరుద్యోగులకు.. ఉపాధి కల్పించలేని స్థితికి చేరుకుందని ఆవేదన వ్యక్తం చేశారు రాహుల్​. మారటోరియం తర్వాత చాలా మంది అసంఘటిత రంగం నుంచి వైదొలుగుతారని... ఇది ఉపాధి సంక్షోభానికి దారి తీస్తుందని వెల్లడించారు.

"దేశంలో 90 శాతం ఉద్యోగాలు కల్పిస్తున్నది అసంఘటిత రంగమే. వారు ఎవరు? చిన్న, మధ్యతరహా పరిశ్రమలు, రైతులే. ఈ వ్యవస్థను ప్రధాని నరేంద్రమోదీ నాశనం చేశారు. మారటోరియం తర్వాత ఒకదాని తర్వాత మరొకటి చొప్పున కంపెనీలు వైదొలగటాన్ని మీరు చూస్తారు." అని అన్నారు రాహుల్.