ప్రధాని మోదీ ఓ అసత్యాగ్రహి: రాహుల్​ గాంధీ

మధ్యప్రదేశ్​ రేవాలోని సౌర విద్యుత్​ ప్రాజెక్టే.. ఆసియాలో అతిపెద్దదన్న ప్రధాని మోదీ వ్యాఖ్యలను కాంగ్రెస్​ తప్పుపట్టింది. కర్ణాటకలో పావగడ పార్కు కన్నా.. రేవా పార్కు ఉత్పత్తి సామర్థ్యం తక్కువని గుర్తుచేసింది. ఈ నేపథ్యంలో మోదీని విమర్శిస్తూ ట్వీట్​ చేశారు రాహుల్​.

కేంద్రంపై కాంగ్రెస్​ సీనియర్​ నేత రాహుల్​ గాంధీ విమర్శల బాణాలు కొనసాగుతున్నాయి. తాజాగా సౌర్​ విద్యుత్​ ప్రాజెక్టు విషయమై ప్రధానమంత్రి నరేంద్ర మోదీ ప్రభుత్వంపై విరుచుకుపడ్డారు రాహుల్​. మధ్యప్రదేశ్​లోని రేవా సోలార్​ పార్క్​.. ఆసియాలోనే అతిపెద్ద సౌరవిద్యుత్​ ప్రాజెక్ట్​ అని మోదీ అన్న వ్యాఖ్యలను ప్రస్తావిస్తూ.. "అసత్యాగ్రహి" అని హిందీలో ట్వీట్​ చేశారు. సత్యం కోసం జరుగుతున్న పోరాటాన్ని విశ్వసించని వారిని అసత్యాగ్రహి అంటారు.

శుక్రవారం.. మధ్యప్రదేశ్​లోని రేవాలో సౌర విద్యుత్​ పార్క్​ను ప్రారంభించారు మోదీ. ఈ నేపథ్యంలో ఈ ప్రాజెక్ట్​ ఆసియాలోనే అతిపెద్దది అని పేర్కొన్నారు.

ఇదే విషయంపై కర్ణాటక కాంగ్రెస్​ నేత డీకే శివకుమార్​.. కేంద్ర ప్రభుత్వంపై ప్రశ్నల వర్షం కురిపించారు.

"కర్ణాటకలోని పావగడ సోలార్​ పార్క్ సామర్థ్యం​ 2,000 మెగా వాట్లు. మధ్యప్రదేశ్​లోని రేవా సౌర విద్యుత్​ పార్కు సామర్థ్యం కేవలం 750 మెగా వాట్లు. అలాంటప్పుడు.. రేవాలోని సౌర విద్యుత్​ పార్కు ఆసియాలోనే అతిపెద్దదని కేంద్రం ఎలా అనగలదు? దీనిపై కేంద్ర విద్యుత్​ శాఖ మంత్రి స్పష్టతనివ్వాలి."

--- డీకే శివకుమార్​, కాంగ్రెస్​ సీనియర్​ నేత.