'ధిక్కరణ'పై రాహుల్​కు సుప్రీం మరో అవకాశం

కోర్టు ధిక్కరణ కేసులో స్పష్టంగా మరో ప్రమాణపత్రాన్ని దాఖలు చేయాలని కాంగ్రెస్​ అధ్యక్షుడు రాహుల్​ గాంధీని ఆదేశించింది సుప్రీంకోర్టు. ఇది వరకు సమర్పించిన అఫిడవిట్​లపై అసంతృప్తి వ్యక్తం చేసింది. తదుపరి విచారణను వచ్చే నెల 6కు వాయిదా వేసింది.

కోర్టు ధిక్కరణ కేసులో మరో ప్రమాణపత్రాన్ని దాఖలు చేసేందుకు కాంగ్రెస్​ అధ్యక్షుడు రాహుల్​ గాంధీకి అవకాశమిచ్చింది సుప్రీంకోర్టు. వివరణను స్పష్టంగా నివేదించాలని ఆదేశించింది.

కాపలాదారే దొంగ అని రఫేల్​ తీర్పులో సుప్రీంకోర్టే చెప్పిందని గతంలో రాహుల్​ గాంధీ వ్యాఖ్యానించారు. ఈ వ్యాఖ్యలపై అభ్యంతరం వ్యక్తం చేస్తూ భాజపా నేత మీనాక్షి లేఖి కోర్టు ధిక్కరణ పిటిషన్​ వేశారు. కోర్టు సైతం వ్యాఖ్యలను తప్పుగా ఆపాదించారని అభిప్రాయపడుతూ రాహుల్​కు నోటీసులు జారీ చేసింది.

పొరపాటే

ప్రధాన న్యాయమూర్తి జస్టిస్​ రంజన్​ గొగొయి నేతృత్వంలోని ధర్మాసనం ఈ కోర్టు ధిక్కరణ పిటిషన్​పై నేడు విచారణ జరిపింది. తన వ్యాఖ్యలను అత్యున్నత న్యాయస్థానానికి ఆపాదించడం పొరపాటుగా జరిగిందని రాహుల్​ తరఫు న్యాయవాది అభిషేక్​ మను సింఘ్వీ అత్యున్నత న్యాయస్థానానికి విన్నవించారు. ప్రమాణపత్రంలో విచారం వ్యక్తంచేయడం... క్షమాపణ చెప్పడం లాంటిదేనని విన్నవించారు.

ఏం చెప్పాలనుకుంటున్నారు?

రాహుల్​ గాంధీ దాఖలు చేసిన అఫిడవిట్​ను ధర్మాసనం పరిశీలించింది. ఓసారి తప్పు చేశామని, మరోసారి చేయలేదని అంటున్నారని రాహుల్​ తీరుపై ఆగ్రహం వ్యక్తం చేసింది. కోర్టు ధిక్కరణ విషయంలో వివరణను స్పష్టంగా సమర్పించాలని ఆదేశించింది.

"అసలు అఫిడవిట్​లో ఏం చెప్పాలనుకుంటున్నారో అర్థం చేసుకోవడం మాకు కష్టమవుతోంది."
-- ధర్మాసనం

ఈసారి దాఖలు చేసే ప్రమాణపత్రంలో రాజకీయాల ప్రస్తావన వద్దని రాహుల్​ తరఫు న్యాయవాదికి ధర్మాసనం సూచించింది.

క్షమాపణ చెప్పాల్సిందే

భాజపా ఎంపీ మీనాక్షి లేఖీ తరఫున న్యాయవాది ముకుల్​ రోహత్గీ ధర్మాసనం ముందు వాదనలు వినిపించారు. ధిక్కరణ కేసుల్లో విచారం వ్యక్తంచేస్తే సరిపోదని, బేషరతు క్షమాపణ చెప్పాల్సిందేనని తేల్చిచెప్పారు.

ఇరుపక్షాల వాదన విన్న అత్యున్నత న్యాయస్థానం తదుపరి విచారణను మే 6వ తేదీకి వాయిదా వేసింది.