'లాక్​డౌన్​'ను ఉల్లంఘిస్తే 6 నెలలు జైల్లో గడపాల్సిందే!

దేశంలో కరోనా వేగంగా వ్యాప్తి చెందుతుండగా అత్యధిక రాష్ట్రాలు లాక్​డౌన్​లోకి వెళ్లాయి. అయితే కొందరు ప్రభుత్వాల ఆదేశాలు పాటించడం లేదు. దీంతో ఉల్లంఘించిన వారికి 6నెలలు జైలు శిక్ష, జరిమానా విధిస్తామని కర్ణాటక సర్కారు హెచ్చరించగా.. అతిక్రమించిన వారంతా మూర్ఖులని మహారాష్ట్ర ఉప ముఖ్యమంత్రి అజిత్​ పవార్​ తీవ్ర వ్యాఖ్యలు చేశారు.

దేశవ్యాప్తంగా కరోనా వ్యాప్తిని అరికట్టే క్రమంలో మెజారిటీ రాష్ట్రాలు లాక్​డౌన్​ను ప్రకటించాయి. అయితే కొందరు ఈ నిర్బంధాన్ని లెక్కచేయకపోవడాన్ని ఆయా రాష్ట్ర ప్రభుత్వాలు తీవ్రంగా పరిగణిస్తున్నాయి. కర్ణాటకలో మార్చి 31 వరకు ప్రజలంతా లాక్​డౌన్​ను అనుసరించాలని ప్రభుత్వం కోరింది. ఎవరైనా నిర్బంధాన్ని అతిక్రమిస్తే ఆరునెలల జైలుశిక్ష, జరిమానా విధిస్తామని హెచ్చరించింది. నిర్బంధ కాలం ముగిసే వరకు ఎక్కడివారు అక్కడే ఉండాలని హోం మంత్రి బసవరాజ్​ ఆదేశించారు.

ప్రజల క్షేమం కోసమే...

కరోనా వ్యాప్తి దృష్ట్యా దిల్లీలో సైతం లాక్​డౌన్​లోకి వెళ్లిపోయింది.​ ప్రజలంతా నిర్బంధానికి మద్దతివ్వాలని ముఖ్యమంత్రి అరవింద్​ కేజ్రీవాల్​ కోరారు. అత్యవసర సేవలకోసం 50 శాతం దిల్లీ ట్రాన్స్​పోర్ట్ కార్పొరేషన్​(డీటీసీ) బస్సులను అందుబాటులో ఉంచినట్లు పేర్కొన్నారు. ప్రజల క్షేమం కోసమే నిర్బంధాన్ని విధించినట్లు వివరించారు.

వారంతా మూర్ఖులే...

మహారాష్ట్రలోని ప్రధాన నగరాల్లో దిగ్బంధం విధించారు. లాక్​డౌన్​ను అతిక్రమించిన వారంతా మూర్ఖులని​ మహారాష్ట్ర ఉప ముఖ్యమంత్రి అజిత్​ పవార్​ తీవ్ర వ్యాఖ్యలు చేశారు. వారు ఇతరుల జీవితాలకు ముప్పు కలిగించిన వారవుతారన్నారు.

లాక్​డౌన్​ అమలును లెక్కచేయని వారిపై రాష్ట్ర ప్రభుత్వం కఠిన చర్యలు తీసుకుంటుందని హెచ్చరించారు. ప్రజలు స్వచ్ఛందంగా గృహ నిర్బంధాన్ని పాటించాలని కోరారు.