భాజపాలోకి పాప్​ సింగర్​ దలేర్​ మెహందీ...

సార్వత్రిక ఎన్నికల ముందు సినీనటుల్ని, క్రీడాకారుల్ని రాజకీయాల్లోకి తీసుకొస్తున్నాయి ప్రధాన పార్టీలు. ఇటీవల నటుడు సన్నీ దేఓల్​, క్రికెటర్​ గంభీర్ భాజపాలో.. ఊర్మిళా మతోంద్కర్​ కాంగ్రెస్​లో చేరారు. ​ తాజాగా ప్రముఖ పాప్​ సింగర్​ దలేర్​ మెహందీ కాషాయ పార్టీలో చేరికయ్యారు.

ప్రముఖ పంజాబీ గాయకుడు, పాప్​ సింగర్​ దలేర్​ మెహందీ భాజపా తీర్థం పుచ్చుకున్నారు. దిల్లీలో కేంద్ర మంత్రి విజయ్​ గోయల్​, దిల్లీ భాజపా అధ్యక్షుడు మనోజ్​ తివారీ, వాయువ్య దిల్లీ భాజపా అభ్యర్థి హన్స్​ రాజ్​ సమక్షంలో పార్టీ కండువా కప్పుకున్నారు దలేర్​. హన్స్​ రాజ్​కు దలేర్​ దగ్గరి బంధువు.

పంజాబ్​కు చెందిన ఈ పాప్​ సింగర్​కు యువతలో మంచి క్రేజ్​ ఉంది. దిల్లీ అసెంబ్లీ ఎన్నికల్లో పోటీ చేయాలనే ఉత్సుకతతో 2013లో కాంగ్రెస్​లో చేరారు మెహందీ. 'నహీ రుకేగీ మేరీ దిల్లీ' అంటూ సాగే అప్పటి కాంగ్రెస్​ ప్రచార గీతానికి తన గాత్రం అందించారు.

అయితే.. పాప్​ గాయకుడి చేరికతో భాజపాకు ఎలాంటి లాభం ఒనగూరదని పేర్కొంటున్నారు విశ్లేషకులు. అక్రమ మానవ రవాణా కేసులో నేరారోపణలే దీనికి కారణంగా చెబుతున్నారు.

ఇదీ చూడండి:సీజేఐపై ఆరోపణల కేసులో అంతర్గత విచారణ