కరోనాపై పోరు: నెలాఖరు వరకు ఆ రాష్ట్రాలు బంద్​

పంజాబ్​లో ఈ నెల 31వరకు రాష్ట్రవ్యాప్త బంద్​ పాటించాలని ఆదేశించింది అక్కడి ప్రభుత్వం. కరోనా వ్యాప్తి నియంత్రణకు ఈ నిర్ణయం తీసుకుంది అమరీందర్​ సింగ్ సర్కార్. అటు ఒడిశా ప్రభుత్వం ఈనెల 29 వరకు బంద్ ప్రకటించింది.

కరోనా వ్యాప్తిని అరికట్టేందుకు పంజాబ్​ ప్రభుత్వం కీలక నిర్ణయం తీసుకుంది. నేటి జనతా కర్ఫ్యూను ఆ రాష్ట్రంలో మార్చి​ 31వరకు బంద్​గా కొనసాగించాలని నిర్ణయించింది.

ఆహారం, ఔషధాలు మినహా ఇతర దుకాణాలన్నీ మూసేయాలని ఆదేశించారు ముఖ్యమంత్రి అమరీందర్ సింగ్. జిల్లా కలెక్టర్లు, ఎస్పీలు ఈ ఆదేశాలు కచ్చితంగా అమలయ్యేలా చూడాలని నిర్దేశించారు.

పంజాబ్​లో ఇప్పటికే 14 మందికి కరోనా సోకినట్లు నిర్ధరణ అయ్యింది.

ఒడిశాలో...

ఒడిశా సైతం ఇదే తరహా నిర్ణయం తీసుకుంది. ఖుర్దా, కటక్, గంజాం, కేంద్రపడ, అంగుల్ జిల్లాలు సహా పూరి, రవుర్కెలా, సంబల్​పుర్​, ఝర్సుగూడ, బాలేశ్వర్ జాజ్​పుర్​, భద్రక్ పట్టణాల్లో ఈనెల 29వ తేదీ రాత్రి 9 గంటల వరకు బంద్​ పాటించాలని ఆదేశించింది.

ఇదీ చదవండి:భారత్​లోని ప్రధాన నగరాల్లో జనతా కర్ఫ్యూ ఇలా...