దేశంలో కొవిడ్ మహమ్మారి అంతకంతకూ వ్యాప్తి చెందుతున్న తరుణంలో ఆయా రాష్ట్రాలు లాక్‌డౌన్‌నే ఆయుధంగా ఎంచుకున్నాయి. పంజాబ్‌లో మరో రెండు వారాలపాటు లాక్‌డౌన్‌ను పొడిగిస్తున్నట్లు ఆ రాష్ట్ర ముఖ్యమంత్రి అమరీందర్‌ సింగ్‌ వెల్లడించారు. వైరస్‌ను పూర్తిగా కట్టడిచేసేందుకే ఈ నిర్ణయం తీసుకున్నట్లు ఆయన స్పష్టం చేశారు. ఫలితంగా పంజాబ్‌లో మే 3 నుంచి మరో రెండు వారాలపాటు లాక్‌డౌన్‌ అమల్లో ఉండనుంది.
4 గంటలు సడలింపు
కర్ఫ్యూ నేపథ్యంలో రోజూ 4 గంటలపాటు మాత్రమే సడలింపు ఉంటుందని సీఎం వీడియో సమావేశంలో చెప్పారు. ఈ మేరకు ఉదయం 7 నుంచి 11 గంటల వరకు దుకాణాలు తెరిచి ఉంచేందుకు అనుమతినిస్తూ.. సంబంధిత మార్గదర్శకాలను జారీ చేసింది ప్రభుత్వం. వైరస్‌ వ్యాప్తిని అరికట్టేందుకు సామాజిక దూరం పాటిస్తూ.. మాస్కులు, శానిటైజర్లను తప్పనిసరిగా వాడాలని సూచించింది.