బడా రుణ ఎగవేతదారుల పేర్లు ఇవ్వండి: సీఐసీ

రుణ ఎగవేతదారులుగా తీర్మానించాలని బ్యాంకులకు పంపిన జాబితాలోని బడా రుణ గ్రహీతల వివరాలు ఇవ్వాలని రిజర్వు​ బ్యాంకును ఆదేశించింది కేంద్ర సమాచార కమిషన్​(సీఐసీ). లఖ్​నవూకు చెందిన సామాజిక కార్యకర్త నతున్​ ఠాకూర్​ ఫిర్యాదు మేరకు  వివరాలను కోరింది.

బ్యాంకుల నుంచి రూ.వేలకోట్ల రుణాలు తీసుకుని తిరిగి చెల్లించకుండా ఉన్న బడా రుణ గ్రహీతల పేర్లు అందజేయాలని రిజర్వు​ బ్యాంకును ఆదేశించింది కేంద్ర సమాచార కమిషన్​. రుణ ఎగవేతదారులుగా తీర్మానించాలని గతంలో కొందరి పేర్లతో కూడిన జాబితాను బ్యాంకులకు పంపింది ఆర్​బీఐ. ఆ జాబితాలోని పెద్ద మొత్తంలో రుణాలు పొందిన వారి వివరాలు ఇవ్వాలని సీఐసీ పేర్కొంది.

లఖ్​నవూకు చెందిన సామాజిక కార్యకర్త నతున్​ ఠాకూర్​ ఫిర్యాదుపై విచారణ చేపట్టింది సీఐసీ.

2017లో ఆర్బీఐ డిప్యూటీ గవర్నర్​ విరల్​ ఆచార్య.. రుణ ఎగవేతదారుల జాబితాను బ్యాంకులకు పంపించినట్లు పేర్కొన్న విషయంపై ఆర్టీఐ కింద దరఖాస్తు చేశారు ఠాకూర్​. మీడియా సమావేశంలో ఆచార్య పేర్కొన్న జాబితాలోని రుణ ఎగవేతదారుల వివరాలు, నోట్​ షీట్స్​, వారి ఖాతాల వివరాలు ఇవ్వాలని ఆర్బీఐను కోరారు​. కానీ ఆర్బీఐ ఆమె దరఖాస్తును తిరస్కరించింది. అది గోప్యంగా ఉంచాల్సిన సమాచారమంటూ పేర్కొంది.

ఆర్బీఐ తన దరఖాస్తును తిరస్కరించటంపై సీఐసీని ఆశ్రయించారు ఠాకూర్​.

ఆర్టీఐ చట్టంలోని సెక్షన్​ 8(1)(d) ఈ దరఖాస్తుకు వర్తించదని పేర్కొన్నారు ముఖ్య ప్రజా సమాచార అధికారి సురేష్​ చంద్ర. కానీ ఆర్బీఐ చట్టం సెక్షన్​ 45సీ, ఈ కిందకు వస్తుందని తెలిపారు. వివాద పరిష్కార ప్రక్రియలో భాగంగా రెండు దశల్లో సమాచారం ఇవ్వాలని ఆర్బీఐకు తెలిపారు. మొదటి దశలో అందించిన సమాచారానికి ఫిర్యాదుదారు సంతృప్తి చెందకుంటే... సీఐసీ ముందు రెండో అభ్యర్థన దాఖలు చేయాలని పేర్కొన్నారు.

ఇదీ చూడండి: 'గణాంక వ్యవస్థలో మార్పులు అవసరం'