కరోనా వ్యాక్సినేషన్​కు మోదీ చతుర్భుజ ప్రణాళిక

దేశంలో కరోనా కేసులు విపరీతంగా పెరిగిపోతున్న నేపథ్యంలో వ్యాక్సిన్​ అభివృద్ధి, పంపిణీ సన్నద్ధతపై ఉన్నతస్థాయి సమీక్ష నిర్వహించారు ప్రధానమంత్రి నరేంద్ర మోదీ. పెద్ద ఎత్తున టీకా పంపిణీ కార్యక్రమానికి తక్షణమే ప్రణాళిక సిద్ధం చేయాలని అధికారులను ఆదేశించారు. ​దేశంలోని ప్రతిఒక్కరికి టీకా అందేందుకు నాలుగు పద్ధతులు సూచించారు. ​

దేశంలో కరోనా మహమ్మారి విజృంభిస్తున్న నేపథ్యంలో ఉన్నతస్థాయి సమీక్షా సమావేశం నిర్వహించారు ప్రధానమంత్రి నరేంద్ర మోదీ. కొవిడ్​-19 టీకా ఎప్పటికి అందుబాటులోకి వస్తుంది, పంపిణీ కార్యక్రమాల సన్నద్ధత ఎలా ఉంది అనే అంశాలపై అధికారులతో చర్చించారు.

ఈ సందర్భంగా దేశంలో 130 కోట్ల మందికి టీకా అందించేందుకు నాలుగు మార్గదర్శకాలను సూచించారు మోదీ. వ్యాక్సినేషన్​లో కీలకమైన మెడికల్​ సరఫరా గొలుసు, ఎవరికి ముందు ఇవ్వాలి, వివిధ విభాగాల మధ్య సమన్వయంతో పాటు ప్రైవేటు విభాగాలు, పౌరుల పాత్ర వంటి వాటిపై చర్చించారు. మోదీ చేసిన సూచనల్లో ముఖ్యమైనవి...

తొలి ప్రాధాన్యం..

కరోనా వైరస్​ బారిన పడేందుకు అధికంగా ముప్పు ఉన్న వారిని గుర్తించి, తొలి ప్రాధాన్యం ఇవ్వాలి. ఉదాహరణకు వైద్యులు, నర్సులు, ఆరోగ్య సిబ్బంది, వైద్యేతర కరోనా యోధులు​, ముప్పు పొంచి ఉన్న ప్రజలకు ముందుగా ఇవ్వాలి.

ఎవరికైనా, ఎక్కడైనా..

టీకా ప్రతి ఒక్కరికి అందాలే చర్యలు తీసుకోవాలి. దేశంలో ఎవరు ఎక్కడున్నా ఆ ప్రాంతానికి వాక్సిన్​ సరఫరా కావాలి. టీకా పంపిణీకి అడ్డుపడేలా ఎలాంటి ఆంక్షలు ఉండకూడదు.

అందరికీ అందుబాటులో..

టీకా అందరికీ అందేలా సరసమైన ధరలో సార్వత్రికంగా అందుబాటులో ఉండాలి. ఎవరూ టీకాకు దూరం కాకూడదు.

సాంకేతికంగా పర్యవేక్షణ..

వాక్సిన్​ ఉత్పత్తి నుంచి.. పంపిణీ వరకు సాంకేతిక పరిజ్ఞానం సాయంతో పర్యవేక్షణ ఉండాలి.

ప్రణాళిక సిద్ధం చేయాలి..

నిర్ణీత సమయంలో, సమర్థంగా టీకాలు వేసేందుకు వివిధ సాంకేతిక సాధనాలను అందుబాటులోకి తీసుకురావాలని అధికారులను ఆదేశించారు ప్రధాని. పెద్ద ఎత్తున టీకాలు వేసేందుకు తక్షణే పూర్తిస్థాయి ప్రణాళిక రచించాలని సూచించారు. భారత్​ సహా ప్రపంచవ్యాప్తంగా వివిధ దేశాల్లో కరోనా వ్యాక్సిన్​ అభివృద్ధి ప్రయత్నాలు ఏ దశలో ఉన్నాయనే అంశంపైనా చర్చించారు. కొవిడ్​ టీకా అభివృద్ధిలో ముఖ్యమైన పాత్ర పోషించేందుకు భారతదేశ బాధ్యత, నిబద్ధతను చూపాలన్నారు మోదీ.

ఇదీ చూడండి: 'చెప్పేవి 'స్వదేశీ' మాటలు.. దింపేవి చైనా వస్తువులు'