రాజ్యాంగ నిర్మాతకు రాష్ట్రపతి, ప్రధాని నివాళులు

రాజ్యాంగ నిర్మాత డా. బి.ఆర్​ అంబేడ్కర్​ వర్ధంతి సందర్భంగా రాష్ట్రపతి రామ్​నాథ్​ కోవింద్​, ఉపరాష్ట్రపతి వెంకయ్య నాయుడు, ప్రధాని నరేంద్ర మోదీ నివాళులు అర్పించారు. రాజ్యాంగ నిర్మాణంలో ఆయన పాత్ర ప్రత్యేకమని కీర్తించారు.

దేశానికి డా.బి.ఆర్​ అంబేడ్కర్ రాజ్యాంగం రూపంలో ఒక గొప్ప బహుమతి ఇచ్చారని ప్రధాని నరేంద్ర మోదీ కీర్తించారు. అంబేడ్కర్​ 68వ వర్ధంతి సందర్భంగా పార్లమెంటులోని ఆయన చిత్రపటానికి.. రాష్ట్రపతి రామ్​నాథ్​ కోవింద్, ఉపరాష్ట్రపతి వెంకయ్య నాయుడు, మోదీ, మాజీ ప్రధాని మన్మోహన్​ సింగ్ శ్రద్ధాంజలి ఘటించి నివాళులు అర్పించారు. ఈ సందర్భంగా రాజ్యాంగ నిర్మాతగా ఆయన పాత్రను గుర్తుచేసుకుంటూ మోదీ ట్వీట్​ చేశారు.

"రాజ్యాంగం రూపంలో దేశానికి బాబాసాహెబ్​ అపురూపమైన బహుమతి ఇచ్చారు. దేశ ప్రజాస్వామ్యానికి ఆ రాజ్యాంగమే మూలాధారం. ఆయనకు ఈ దేశం ఎల్లప్పటికీ రుణపడి ఉంటుంది." - ప్రధాని నరేంద్ర మోదీ ట్వీట్.

ఈ సందర్భంగా ట్విట్టర్​లో అంబేడ్కర్​పై ఓ వీడియోను షేర్​ చేశారు మోదీ.