దేశవ్యాప్తంగా లాక్డౌన్ విధించిన వేళ వలస కార్మికులు తీవ్ర ఇబ్బందులు పడుతున్నారు. చేయటానికి పనులు లేక, కుటుంబ పోషణకు డబ్బులు లేక దుర్భర జీవితాలను గడుపుతున్నారు. ఈ తరుణంలో శనివారం ఓ గర్భవతితో సహా మొత్తం 18 మంది వలస కార్మికుల కుటుంబం గుజరాత్లోని దౌసా నుంచి ఉత్తరప్రదేశ్లోని బరేలీకి కాలినడకన బయలుదేరారు. తన భర్త బలవంతం చేసిన కారణంగానే తాను బయలుదేరినట్లు తెలిపింది ఆ గర్భవతి.
"మేమందరం దౌసాలోని ఓ ఇటికబట్టీలో పని చేస్తున్నాం. మా యజమాని పని వద్దకు రావటం లేదు. మా బాధను పట్టించుకోవటం లేదు. పని చేయకపోతే మాకు డబ్బులు ఎక్కడ నుంచి వస్తాయి? అధికారులు మమ్మల్ని నడవకుండా ఆపలేరు" అని కుటుంబసభ్యుల్లో ఒకరైనా నంద్రామ్ తెలిపారు.
నిండు చూలాలు.. వందల కిలోమీటర్ల నడక ప్రయాణం "మా కూతురు గర్భవతి కారణంగానే దౌసా నుంచి బరేలీలో ఉన్న సొంత ఇంటికి వెళ్తున్నాము. మేమందరం కాలినడకనే ఉత్తరప్రదేశ్కు బయలుదేరాము. ఇక్కడ ఆసుపత్రులు ఎలా ఉంటాయో మాకు తెలియదు, కనుక ఆ భయంతోనే ఇంటికి వెళ్తున్నాము. ఇది మా సొంత ఊరు కాదు." అని కుటుంబ సభ్యురాలు చంద్రకళ వెల్లడించింది.
గర్భవతికి సంబంధించి ఆసుపత్రికి అయ్యే ఖర్చును ఇవ్వాలని యజమానిని కోరినప్పటికి అతను కుదరదని చెప్పినట్లు పేర్కొంది. ఆ నగదు ఇక్కడ ఉండి సమకూర్చుకోలేకనే తన భర్త ఇంటికి వెళ్లాలని నిశ్చయించుకున్నట్లు వెల్లడించింది. ఇంటికి వెళ్తే ఏ విధంగానైనా చికిత్స చేయించుకోగలమన్న నమ్మకంతోనే వెళ్తున్నట్లు తెలిపింది. మార్గ మధ్యలో అనేక చెక్పోస్ట్లను దాటుకుంటూ వెళ్తునప్పటికినూ ఆమె పరిస్థితిని చూసి ఒక్కరు కూడా సాయం చేయటం లేదని ఆవేదన వ్యక్తం చేసింది. తప్పని పరిస్థితుల్లో వందల కిలోమీటర్ల మేర నడక ప్రయాణం చేస్తున్నట్లు తెలిపింది.
