దిల్లీ దంగల్​: 70 స్థానాలకు పోలింగ్​ షురూ

దేశం ఎంతో ఉత్కంఠగా ఎదురుచూస్తున్న దిల్లీ ఎన్నికల పోలింగ్​ ప్రారంభమైంది. దాదాపు కోటీ 47 లక్షల మంది తమ ఓటు హక్కును వినియోగించుకోనున్నారు. 70 నియోజకవర్గాల్లో మొత్తం 672 మంది అభ్యర్థులు పోటీపడుతున్నారు. ఎన్నికల నేపథ్యంలో అధికారులు కట్టుదిట్టమైన భద్రతను ఏర్పాటు చేశారు. సాయంత్రం 6 గంటల వరకు పోలింగ్​ సాగనుంది.

70 స్థానాలున్న దిల్లీ శాసనసభకు పోలింగ్​ ప్రారంభమైంది. ప్రజాస్వామ్యంలోని అతి ముఖ్యమైన హక్కును వినియోగించుకునేందుకు ప్రజలు పోలింగ్​ కేంద్రాలకు తరలివెళ్తున్నారు. 672 మంది అభ్యర్థుల భవితవ్యాన్ని కోటి 47 లక్షల మంది ఓటర్లు తేల్చనున్నారు.

ప్రజలు ఎలాంటి అసౌకర్యానికి గురికాకుండా ప్రత్యేక ఏర్పాట్లు చేశారు అధికారుల. ఒక్కో నియోజకవర్గం చొప్పున మొత్తం 70 పోలింగ్​ కేంద్రాలను ఏర్పాటు చేశారు. వృద్ధులు, దివ్యాంగులకు తగిన ఏర్పాట్లు చేశారు. అవాంఛనీయ ఘటనలు జరగంకుండా 90 వేల మంది భద్రతా బలగాలను దిల్లీ అంతటా మోహరించారు. సాయంత్రం 6 గంటల వరకు పోలింగ్​ కొనసాగుతుంది.

షహీన్​బాగ్​పై ప్రత్యేక నిఘా..

పౌరసత్వ చట్టానికి వ్యతిరేకంగా షహీన్​బాగ్​లో నిరసనలు కొనసాగుతున్న నేపథ్యంలో ఆ ప్రాంతంలోని 5 పోలింగ్ కేంద్రాలపై ప్రత్యేక నిఘా ఏర్పాటు చేశారు అధికారులు. భారీగా బలగాలను మోహరించనున్నట్లు తెలిపారు.

ఆప్​.. భాజపా...

అధికార ఆప్​... విపక్ష భాజపా హోరాహోరీగా ప్రచారాలు నిర్వహించాయి. కాంగ్రెస్​ కూడా తమ అగ్రనేతలను ప్రచార అస్త్రాలుగా ఉపయోగించుకుంది. ఈ నేపథ్యంలో దిల్లీ ఓటర్లు ఎవరికి ముఖ్యమంత్రి పీఠాన్ని కట్టపెడతారన్నది ఉత్కంఠ రేకెత్తిస్తోంది.