ఝార్ఖండ్​లో మొదటి దశ పోలింగ్​ ప్రారంభం

ఝార్ఖండ్​లో మొదటి దశ అసెంబ్లీ ఎన్నికల పోలింగ్ ప్రారంభమైంది. సాయంత్రం 3 గంటలకు ముగుస్తుంది. మొత్తం 13 స్థానాలకు జరుగుతున్న ఈ ఎన్నికల్లో 189 మంది బరిలో ఉన్నారు.

ఝార్ఖండ్ మొదటి దశ అసెంబ్లీ ఎన్నికల పోలింగ్ ప్రారంభమైంది. ఓటింగ్ ప్రక్రియ సాయంత్రం 3 గంటల వరకు కొనసాగనుంది. ఎన్నికల కోసం అధికారులు పటిష్ట భద్రతా చర్యలు చేపట్టారు.

మొదటి దశలో 13 స్థానాలకు ఎన్నికలు నిర్వహిస్తున్నారు. ఇవాళ జరుగుతున్న పోలింగ్​లో.. మొత్తం 189 మంది అభ్యర్థుల భవితవ్యాన్ని 37,83,055 మంది ఓటర్లు తేల్చనున్నారు.

ఎన్నికలు జరుగుతున్న స్థానాలివే..

మొదటి దశలో ఛత్రా, గుమ్లా, బిషున్​పుర్​, లోహర్​దగా, మణికా, లతేహర్​, పంకీ, డాల్టన్​గంజ్​, బిష్రాంపుర్, ఛతర్​పుర్​, హుస్సేనాబాద్​, గర్వా, భవానాథ్​పుర్​ స్థానాలకు ఎన్నికలు జరుగుతున్నాయి. 15 మంది మహిళలతో సహా 189 మంది అభ్యర్థులు పోటీపడుతున్నారు.

నువ్వా.. నేనా

ఈ 13 నియోజకవర్గాల్లో.. భాజపా 12 స్థానాల్లో బరిలో నిలిచింది. ఒక స్థానంలో స్వతంత్ర అభ్యర్థికి మద్దతు ప్రకటించింది. కూటమిగా ఏర్పడ్డ ప్రతిపక్షాలు ఝార్ఖండ్ ముక్తి మోర్చా 4, కాంగ్రెస్‌ 6, ఆర్​జేడీ 3 స్థానాల్లో పోటీ చేస్తున్నాయి.

ఝార్ఖండ్‌ వైద్యశాఖమంత్రి రామచంద్ర చంద్రవంశీ, కాంగ్రెస్‌ పీసీసీ అధ్యక్షుడు రామేశ్వర్‌ ఓరాన్‌ సహా పలువురు ప్రముఖులు నేటి ఎన్నికల బరిలో ఉన్నారు.

ఐదు దశల్లో

81 అసెంబ్లీ స్థానాలున్న ఝార్ఖండ్​లో మొత్తం ఐదు దశల్లో అసెంబ్లీ ఎన్నికలు జరగనున్నాయి. మొదటి దశ పోలింగ్ ఇవాళ జరుగుతోంది. డిసెంబర్​ 7, 12, 16, 20 తేదీల్లో తదుపరి దశల ఎన్నికలు జరుగుతాయి. డిసెంబర్‌ 23న ఫలితాలు వెలువడతాయి.

ఇదీ చూడండి:గోవా 'సీఎం పీఠం'పై శివసేన కన్ను