ఫరూక్ అబ్దుల్లా 'రోష్ని'​ భూములపై రాజకీయ రగడ

రోష్ని చట్టం ద్వారా లబ్ధిపొందిన వారి పేర్లతో జమ్ముకశ్మీర్​ యంత్రాంగం ఓ జాబితాను విడుదల చేసింది. ఇందులో ఎన్​సీ అధినేత ఫరూక్​ అబ్దుల్లా పేరు ఉంది. ఈ నేపథ్యంలో భూములను ఫరూక్​ ఆక్రమించుకున్నారని భాజపా మండిపడింది. అయితే ఈ ఆరోపణలను ఎన్​సీ ఖండించింది. వాటిలో నిజం లేదని తేల్చిచెప్పింది. 2001రోష్ని చట్టం రాజ్యాంగ విరుద్ధమని, దానిలో జరిగిన అవకతవకలపై సీబీఐ విచారణ చేపట్టాలని ఇటీవలే ఆదేశించింది అక్కడి హైకోర్టు.

జమ్ముకశ్మీర్​లో రోష్ని చట్టాన్ని రాజ్యాంగ విరుద్ధమని అక్కడి హైకోర్టు ప్రకటించిన అనంతరం.. లబ్ధిదారుల జాబితాను విడుదల చేసింది యంత్రాంగం. ఇందులో మాజీ ముఖ్యమంత్రి, ఎన్​సీ అధినేత ఫరూక్​ అబ్దుల్లా, ఆయన కుమారుడు ఒమర్​ అబ్దుల్లా పేర్లు ఉన్నాయి. వారి నివాసాలు అక్రమ భూముల్లో నిర్మించుకున్నారని యంత్రాంగం స్పష్టం చేసింది. వాటితో పాటు శ్రీనగర్​, జమ్ములో ఉన్న పార్టీ ప్రధాన కార్యాలయాలు కూడా అక్రమ భూముల్లోనే నిర్మించారని పేర్కొంది.

'దోచుకున్నారు..'

జమ్ముకశ్మీర్​లో త్వరలో స్థానిక ఎన్నికలు జరగనున్న తురుణంలో.. లబ్ధిదారుల జాబితాలో ఎన్​సీ నేతల పేర్లు ఉండటం తీవ్ర రాజకీయ దుమారానికి దారి తీసింది. 1998లో ఫరూక్​.. 3కెనాళ్ల భూమి(1 కెనాల్​- 505 స్క్వేర్​ మీటర్లు)ని కొనుగోలు చేసి 7కనాళ్ల భూమిని ఆక్రమించుకున్నారని ఆరోపించారు కేంద్రమంత్రి రవిశంకర్​ ప్రసాద్​. అధికారం చేతిలో ఉందని.. కొందరు అక్రమంగా భూములు దోచుకున్నారని విమర్శించారు.

'అవన్ని పచ్చి అబద్ధాలు..'

రోష్ని చట్టంతో ఫరూక్​ అబ్దుల్లా లబ్ధిపొందారన్న ఆరోపణలను ఎన్​సీ ఖండించింది. అవన్ని అబద్ధాలని తేల్చిచెప్పింది. ద్వేషపూరిత ఉద్దేశంతో ఆరోపణలను వ్యాప్తి చేస్తున్నారని మండిపడింది. రోష్ని పథకాన్ని ఫరూక్​ పొందలేదని.. శ్రీనగర్​, జమ్ముల్లో ఉన్న ఆయన నివాసాలకు ఆ పథకంతో సంబంధం లేదని ట్వీట్​ చేసింది.

ఇదీ చూడండి:-రాజకీయ పునరేకీకరణ.. కశ్మీర్‌లో 'గుప్కార్‌ కూటమి'

ఏంటి ఈ చట్టం?

2001 రోష్ని చట్టం కింద.. 20లక్షల కెనాళ్ల భూమిని ప్రజలకు బదిలీ చేయాలని నిర్ణయించింది అప్పటి జమ్ముకశ్మీర్​ ప్రభుత్వం. 3,48,200 కెనాళ్ల భూమిని బదిలీ చేయగా.. అందులో 3,40,100 కెనాళ్ల భూమిని వ్యవసాయ భూమిగా ఉచితంగా పంపిణీ చేశారని ఆరోపణలున్నాయి.

ఈ చట్టంలో జరిగిన అవకతవకలపై సీబీఐ విచారణ జరపాలని ఆదేశించింది జమ్ముకశ్మీర్​ హైకోర్టు. ఈ నేపథ్యంలో ఆరు నెలల్లో భూములను వెనక్కి తీసుకోవాలని నిర్ణయించింది జమ్ముకశ్మీర్​ యంత్రాంగం. ఇందుకోసం ప్రణాళికలను ముమ్మరం చేసింది.

ఇదీ చూడండి:-కశ్మీర్​లో 'స్థానిక' పోరు- కార్యక్షేత్రంలోకి కాషాయదళం