'ఎయిరిండియా​ హీరో'లకు ప్రధాని అభినందనలు

వుహాన్​ నుంచి భారతీయులను తరలించటంలో కీలకంగా వ్యవహరించిన ఎయిర్​ఇండియా, కేంద్ర ఆరోగ్యశాఖ అధికారులను ప్రధాని మోదీ అభినందించారు. ఈ మేరకు అధికారులకు ప్రశంసాపత్రాన్ని జారీ చేసినట్లు ప్రధాని కార్యాలయం తెలిపింది.

ఎయిర్​ ఇండియా, కేంద్ర ఆరోగ్య మంత్రిత్వ శాఖ అధికారులను ప్రధాని నరేంద్రమోదీ అభినందించారు. కరోనా వ్యాప్తి మొదలైన చైనాలోని వుహాన్​ నుంచి భారత్​తో పాటు మాల్దీవులకు చెందిన పౌరులను తీసుకొచ్చినందుకు ప్రశంసించారని ప్రధాని కార్యాలయం తెలిపింది.

"వుహాన్​ నుంచి భారత పౌరుల తరలింపులో పాల్గొన్న బృందానికి ప్రధాని మోదీ ప్రశంసాపత్రం జారీ చేశారు. సిబ్బందికి ఈ లేఖను పౌరవిమానయాన సహాయ మంత్రి అందిస్తారు."

-ప్రధాని కార్యాలయం ప్రకటన

వుహాన్​ నుంచి భారతీయులను తరలించటంలో ఎయిర్​ఇండియా చురుకుగా వ్యవహరించింది. వుహాన్​లో పరిస్థితి గురించి తెలిసినా రెండు భారీ విమానాలను ఎయిర్​ఇండియాతో పాటు ఆరోగ్య శాఖ సిబ్బంది అక్కడికి వెళ్లారు.

కేబినెట్ భేటీలోనూ..

ఈ నెల 5న జరిగిన కేబినెట్​ భేటీలోనూ విమాన సిబ్బందికి కేంద్రమంత్రులు అభినందనలు తెలిపారు. ఈ విషయంలో ఎలాంటి భయం లేకుండా విధులు నిర్వహించారని ప్రశంసించారు.