త్వరలో థాయ్​లాండ్ పర్యటనకు మోదీ

ప్రధాని నరేంద్ర మోదీ... థాయ్​లాండ్​ పర్యటనకు వెళ్లనున్నట్లు విదేశీ వ్యవహారాల శాఖ వెల్లడించింది. నవంబర్​ నెలలో థాయ్​లాండ్​లో జరగబోయే పలు సదస్సులకు మోదీ హాజరవుతారని తెలిపింది.

భారత ప్రధాని నరేంద్ర మోదీ మూడు రోజుల పర్యటన నిమిత్తం థాయ్‌లాండ్‌ వెళ్లనున్నారు. నవంబర్‌ 2 నుంచి 4 వరకు థాయ్‌లాండ్‌లో జరిగే పలు సదస్సుల్లో మోదీ పాల్గొంటారని విదేశీ వ్యవహారాల శాఖ వెల్లడించింది. థాయ్‌లాండ్ ప్రధాని ప్రయుత్‌ ఛాన్‌-ఒ-ఛా ఆహ్వానం మేరకు నరేంద్ర మోదీ బ్యాంకాక్‌ సందర్శించనున్నట్లు విదేశాంగ కార్యదర్శి విజయ్ ఠాకూర్​ సింగ్​ తెలిపారు.

పలు సదస్సులకు హాజరు

పర్యటనలో భాగంగా థాయ్​లాండ్​ జరిగే 16వ ఆసియాన్‌-ఇండియా సదస్సు, 14వ తూర్పు ఆసియా సదస్సు, 3వ ప్రాంతీయ సమగ్ర ఆర్థిక భాగస్వామ్య సదస్సుల్లో మోదీ పాల్గొంటారు. ప్రాంతీయ సమగ్ర ఆర్థిక భాగస్వామ్యానికి సంబంధించిన సమస్యల పరిష్కారానికి బ్యాంకాక్‌లో మంతనాలు జరుగుతున్నాయి. వాటిని సదస్సులో పాల్గొనే దేశాధినేతలు సమీక్షించనున్నారు.