గుజరాత్​లో 'సీప్లేన్' సేవలను ప్రారంభించనున్న మోదీ

సబర్మతి నదిలో ఏర్పాటు చేసిన దేశంలోనే మొట్టమొదటి సీప్లేన్ సేవలను ప్రధానమంత్రి నరేంద్రమోదీ ఈ నెలాఖరున ప్రారంభించనున్నారు. సర్దార్ వల్లభ్​భాయ్ పటేల్ జయంతి సందర్భంగా అక్టోబర్ 31న ఈ సేవలను ఆవిష్కరించనున్నారు. అనంతరం నర్మదా నదిపై ఏర్పాటైన సర్దార్ సరోవర్ ప్రాజెక్టు వద్ద నిర్వహించే జాతీయ ఐక్యతా పరేడ్​లో పాల్గొంటారు.

ప్రధానమంత్రి నరేంద్ర మోదీ అక్టోబర్ 30న తన సొంత రాష్ట్రమైన గుజరాత్​లో పర్యటించనున్నారు. సబర్మతి నదిలో ఏర్పాటు చేసిన సీప్లేన్(నీటిలో నుంచే టేకాఫ్, ల్యాండింగ్ అయ్యే విమానం) సేవలను అక్టోబర్ 31న ప్రారంభించనున్నారు. నర్మదా నదిపై ఉన్న సర్దార్ సరోవర్ ప్రాజెక్టు వద్ద నిర్వహించే జాతీయ ఐక్యతా పరేడ్​లో పాల్గొంటారు.

2017లో సబర్మతి నది నుంచి సీప్లేన్​లో మోదీ షికారు

దేశంలో మొట్టమొదటి సీప్లేన్ సర్వీసుగా ఈ ప్రాజెక్టు రూపుదిద్దుకుంటోంది. పర్యటకానికి మరింత ప్రోత్సాహం అందించేందుకు ఈ సీప్లేన్ సర్వీసులను ఏర్పాటు చేస్తున్నారు. వాస్నా బ్యారేజీ సమీపంలోని అంబేడ్కర్ బ్రిడ్జి వద్ద సీప్లేన్ ల్యాండింగ్ ఏర్పాట్లు జరుగుతున్నాయి.

సబర్మతి నదితో పాటు నర్మదా డ్యాం రిజర్వాయర్, ధారోయ్ డ్యాం రిజర్వాయర్, తాపీ నదిలోనూ సీప్లేన్లు దిగేందుకు ఎయిర్​పోర్ట్ అథారిటీ ఆఫ్ ఇండియా, డైరెక్టర్ జనరల్ ఆఫ్ సివిల్ ఏవియేషన్​లు అనుమతులు ఇచ్చాయి.

అక్టోబర్ 31న సర్దార్ వల్లభ్​భాయ్ పటేల్ జయంతి సందర్భంగా సీప్లేన్ తొలి ట్రిప్ జరగనుంది. ఈ సర్వీసుల కోసం కెనడా నుంచి రెండు సీప్లేన్లను దిగుమతి చేసుకున్నారు. అక్టోబర్ 20 నాటికి అవి ఇక్కడికి చేరుకోనున్నాయి.