వారణాసిలో నేడు ప్రధాని మోదీ నామినేషన్​

వారణాసి లోక్​సభ స్థానం నుంచి నేడు నామినేషన్​ దాఖలు చేయనున్నారు ప్రధాని నరేంద్ర మోదీ. ఈ కార్యక్రమానికి బిహార్​ సీఎం నితీశ్​ కుమార్​, శివసేన అధినేత ఉద్ధవ్​ ఠాక్రే సహా ఎన్డీఏ మిత్రపక్షాల ముఖ్యనేతలు హాజరుకానున్నారు. పలుపురు కేంద్రమంత్రులు, భాజపా నేతలు కార్యక్రమంలో పాల్గొంటారు. కాలభైరవ ఆలయంలో పూజల అనంతరం నామినేషన్​ దాఖలు చేసేందుకు వెళతారు ప్రధాని మోదీ

ఉత్తరప్రదేశ్​లోని వారణాసి లోక్​సభ స్థానానికి ప్రధానమంత్రి నరేంద్ర మోదీ నేడు నామినేషన్​ దాఖలు చేయనున్నారు. ఉదయం 11.30 గంటలకు నామపత్రాలు సమర్పించనున్నారు. 9.30 గంటల సమయంలో భాజపా కార్యకర్తలతో సమావేశమవుతారు మోదీ. ఆ తర్వాత కాలభైరవ ఆలయంలో ప్రత్యేక పూజలు నిర్వహిస్తారు. అనంతరం నామపత్రాల దాఖలుకు వెళతారు.

మోదీ నామినేషన్​ కార్యక్రమాన్ని ఎన్డీఏ ఐక్యతను ప్రదర్శించేందుకు వినియోగించుకోవాలని భాజపా భావిస్తోంది. అందుకే ఈ కార్యక్రమానికి మిత్రపక్షాల నేతలను ఆహ్వానించింది. మోదీ నామినేషన్​ కార్యక్రమానికి బిహార్​ ముఖ్యమంత్రి, జేడీయూ పార్టీ అధినేత నితీశ్​ కుమార్​, శిరోమణి అకాలీ దళ్​ నేత, పంజాబ్​ మాజీ ముఖ్యమంత్రి ప్రకాశ్​ సింగ్​ బాదల్​, లోక్​జన శక్తి పార్టీ నేత రామ్​ విలాస్​ పాసవాన్​, శివసేన అధినేత ఉద్ధవ్​ ఠాక్రే సహా మరిన్ని మిత్రపక్షాల నేతలు హాజరుకానున్నారు.

కేంద్రమంత్రులు సుష్మా స్వరాజ్​, పియూష్​ గోయల్​, జేపీ నడ్డా, నితిన్​ గడ్కరి సహా భాజపా ముఖ్యనేతలు నామినేషన్​ కార్యక్రమంలో పాల్గొంటారు.