'గేట్స్​' పురస్కారంతో మోదీకి సత్కారం- కారణమిదే

ప్రధాని నరేంద్ర మోదీ ప్రతిష్ఠాత్మకంగా ప్రారంభించిన 'స్వచ్ఛ భారత్​ అభియాన్'​కు మరో అంతర్జాతీయ గుర్తింపు లభించింది. వినూత్న ఆలోచనకు బిల్​ అండ్​ మిలిందా గేట్స్​ పురస్కారం వరించింది.

దేశాన్ని పచ్చదనం-పరిశుభ్రంగా మార్చే లక్ష్యంతో ప్రధానమంత్రి నరేంద్రమోదీ ప్రతిష్ఠాత్మకంగా తలపెట్టిన స్వచ్ఛభారత్​ కార్యక్రమానికి మరో అంతర్జాతీయ గుర్తింపు లభించింది. 2019వ సంవత్సరానికి వ్యాపారవేత్త బిల్​గేట్స్ నేతృత్వంలోని బిల్​ అండ్ మిలిందా గేట్స్​ ఫౌండేషన్​ 'గ్లోబల్ గోల్ కీపర్' అవార్డును ప్రకటించింది. సెప్టెంబర్​ 24న అమెరికాలో ఈ అవార్డును స్వీకరించనున్నారు మోదీ.

అంతర్జాతీయ సమాజ లక్ష్యాలను చేరుకునేందుకు తమ దేశం, ప్రపంచ స్థాయిలో అంకితభావం, సమర్థతతో ప్రభావశీలంగా పనిచేసే నేతలకు ఏటా గ్లోబల్​ గోల్​ కీపర్​ పేరుతో అవార్డు అందిస్తుంది బిల్ అండ్ మిలిందా గేట్స్​ ఫౌండేషన్. స్వచ్ఛభారత్​పై చేసిన కృషికి ఈ ఏడాది మోదీని ఈ అవార్డుతో సత్కరించనుంది. ఈ అవార్డు అందించే గ్లోబల్​ బిజినెస్​ ఫారం వేదికగా అంతర్జాతీయ నేతలు, కార్పొరేట్​ దిగ్గజాలను ఉద్దేశించి ప్రసంగించనున్నారు ప్రధాని మోదీ.

ఈ అవార్డులు.. ప్రపంచంలోని గొప్ప వ్యక్తుల గురించి తెలియజేస్తాయని బిల్​ అండ్​ మిలిందా గేట్స్​ ఫౌండేషన్స్​ తెలిపింది. ప్రపంచంలో ఉన్న అసమానతలపై పోరాడటానికి 'గోల్​ కీపర్స్'​ కృషి చేస్తారని అభిప్రాయం వ్యక్తం చేసింది.

2014 అక్టోబరు 2న స్వచ్ఛభారత్​ను ప్రారంభించారు ప్రధాని. 150వ గాంధీ జయంతి(ఈ ఏడాది) నాటికి దేశంలో పారిశుద్యాన్ని పెంపొందించాలని ప్రజలకు పిలుపునిచ్చారు. ఇందులో భాగంగా దేశంలో బహిరంగ మలవిసర్జన నిర్మూలనకు ఇప్పటివరకు 90 మిలియన్ల మరుగుదొడ్లు నిర్మించింది కేంద్రం.

ఇంతకుముందు సంవత్సరాల్లో జరిగిన గోల్​ కీపర్స్​ కార్యక్రమాల్లో ప్రసంగించిన వారిలో అమెరికా మాజీ అధ్యక్షుడు బరాక్​ ఒబామా, ఫ్రెంచ్​ అధ్యక్షుడు ఇమ్మాన్యుయేల్​ మేక్రాన్​, యూఎన్​ డిప్యూటీ సెక్రటరీ జనరల్​ అమీనా మహమ్మద్​, నోబెల్​ శాంతి బహుమతి విజేతలు మలలా యూసఫ్​జాయ్​, నాడియా మురాద్​ ఉన్నారు.

ఇదీ చూడండి:'నిర్మానుష ప్రదేశాల ద్వారా ఉగ్రవాదుల చొరబాటు'