దిల్లీ అల్లర్లపై ప్రధాని మోదీ కీలక వ్యాఖ్యలు

దేశ రాజధాని దిల్లీలో చెలరేగిన అల్లర్లపై ప్రధానమంత్రి నరేంద్ర మోదీ సమీక్షంచారు. దిల్లీ ప్రజలు శాంతియుతంగా, సోదరభావంతో ఉండాలని కోరారు. త్వరలోనే సాధారణ పరిస్థితులు నెలకొంటాయని ఆశాభావం వ్యక్తం చేశారు.

పౌరసత్వ చట్టాన్ని వ్యతిరేకిస్తూ దిల్లీలో చెలరేగిన హింసాత్మక ఘటనలపై తొలిసారి స్పందించారు ప్రధానమంత్రి నరేంద్ర మోదీ. దిల్లీ ప్రజలు శాంతియుతంగా, సోదరభావంతో ఉండాలని కోరారు. దేశ రాజధానిలో నెలకొన్న పరిస్థితులపై విస్తృత సమీక్ష చేపట్టినట్లు ట్వీట్​ చేశారు.

ప్రధాని మోదీ ట్వీట్​

" దిల్లీలోని వివిధ ప్రాంతాల్లో ఉన్న పరిస్థితులపై విస్తృత సమీక్ష జరిగింది. పోలీసులు, ఇతర భద్రత సంస్థలు శాంతిని, సాధారణ స్థితిని కల్పించడానికి కృషి చేస్తున్నారు. శాంతి, సామరస్యం అనేవి మన నైతిక విలువలకు ప్రధానమైనవి. శాంతియుతంగా, సోదరభావంతో ఉండాలని దిల్లీ సోదర, సోదరీమణులకు విజ్ఞప్తి చేస్తున్నా. ప్రశాంతంగా ఉండటం చాలా ముఖ్యం. అతి త్వరలోనే సాధారణ స్థితి నెలకొంటుంది."

- నరేంద్ర మోదీ, ప్రధానమంత్రి.

హస్తినలో చెలరేగిన ఘర్షణల్లో మృతి చెందిన వారి సంఖ్య 20కి చేరింది. పదుల సంఖ్యలో గాయపడ్డారు.