'అభివృద్ధి ఆకాంక్షను చాటారు- నూతన శకం మొదలైంది'

బిహార్​ శాసన సభ ఎన్నికల్లో ఎన్డీఏ కూటమి విజయం సాధించటంపై ప్రధాని నరేంద్ర మోదీ హర్షం వ్యక్తం చేశారు. బిహార్​లో ప్రజాస్వామ్యం బలపడింది అనటానికి ఎన్నికల ఫలితాలే నిదర్శనమని తెలిపారు.

బిహార్​ అసెంబ్లీ ఎన్నికల్లో ఎన్డీఏ విజయ ఢంకా మోగించింది. ఈ సందర్భంగా ప్రధాని నరేంద్ర మోదీ.. రాష్ట్ర ప్రజలకు ట్విట్టర్​ ద్వారా కృతజ్ఞతలు తెలిపారు.

"బిహార్​లో నూతన శకం మొదలైందని యువత నిరూపించారు. అభివృద్ధే బిహార్​ ప్రజల ఆకాంక్ష అని చాటారు. 15ఏళ్లయినా ప్రజలు ఎన్డీఏ సుపరిపాలన చూసి పట్టం కట్టారు. వివక్షకు తావు ఇవ్వకుండా ప్రతి ఒక్కరిని అభివృద్ధి పథంలోకి ఎన్డీఏ ప్రభుత్వం నడిపిస్తుందని హామీ ఇస్తున్నా."

----- ట్విట్టర్​లో ప్రధాని నరేంద్ర మోదీ

మరోవైపు దేశంలోని వివిధ రాష్ట్రాల్లో జరిగిన ఉపఎన్నికల్లో భాజపా విజయంపై మోదీ హర్షం వ్యక్తం చేశారు. గుజరాత్​లో భాజపా 8సీట్లను కైవసం చేసుకుంది. గుజరాత్ ప్రజలకు భాజపాకు విడదీయలేని బంధం ఉందని పేర్కొన్నారు.

బంధం వెలకట్టలేనిది..

మధ్యప్రదేశ్​లో భాజపా విజయానికి పార్టీ కార్యకర్తలు నిరంతరం శ్రమించారని తెలిపారు. పార్టీతో ప్రజలకు ఉన్న బంధం వెలకట్టలేనిదని పేర్కొన్నారు.

కర్ణాటకలో ఉప ఎన్నికలు జరిగిన రెండు స్థానాల్లోనూ భాజపా గెలుపొందింది. ప్రజలు పార్టీపై నమ్మకం ఉంచారని ప్రధాని అన్నారు. ఈ సందర్భంగా ప్రజలకు కృతజ్ఞతలు తెలిపారు.

ఉత్తర్​ప్రదేశ్​లో ఎన్నికలు జరిగిన 7 స్థానాల్లో కమలం 6 స్థానాలను కైవసం చేసుకుంది. పార్టీ కార్యకర్తల కృషిని ప్రధాని కొనియాడారు.

చారిత్రక విజయం

మణిపుర్​లో కమలం విజయం సాధించటంపై ప్రధాని హర్షం వ్యక్తం చేశారు. ఈ సందర్భంగా ప్రజలకు కృతజ్ఞతలు తెలిపారు. మొత్తం 5స్థానాలకు భాజపా నాలుగింట గెలిచింది.