ప్రధాని నరేంద్రమోదీ ఆదివారం తన సొంత నియోజకవర్గం వారణాసిలో పర్యటించనున్నారు. వారణాసిలో 430 పడకల సూపర్ స్పెషాలిటీ ఆస్పత్రి, ఐఆర్సీటీసీకి చెందిన మహాకాల్ ఎక్స్‌ప్రెస్‌సహా 30కి పైగా ప్రాజెక్టులను మోదీ ప్రారంభిస్తారు. ఈ మేరకు ప్రధానమంత్రి కార్యాలయం ఓ ప్రకటన విడుదల చేసింది. అనంతరం ప్రధాని ఓ బహిరంగ సభలో ప్రసంగిస్తారని.. చౌకఘాట్-లెహర్తార వంతెన, బెనారస్ హిందూ విశ్వవిద్యాలయంలో వేదిక్ సైన్స్ కేంద్రాలను ప్రారంభిస్తారని సమాచారం.
వారణాసిలోని శ్రీ జగద్గురు విశ్వారాధ్య గురుకులం శతాబ్ది వేడుకల ముగింపు వేడుకల్లోనూ మోదీ పాల్గొనన్నారు. ఈ సందర్భంగా 19 భాషల్లోకి అనువదించిన శ్రీ సిద్ధాంత శిఖామణి గ్రంథాన్ని.. దీనికి సంబంధించిన మొబైల్ యాప్‌ను ఆవిష్కరిస్తారు. అనంతరం పండిట్ దీన్‌దయాళ్ ఉపాధ్యాయ స్మారక కేంద్రాన్ని ప్రారంభించనున్న మోదీ.. అక్కడ ఏర్పాటు చేసిన పండిట్ దీన్‌దయాళ్ 63 అడుగుల పంచలోహ విగ్రహాన్ని జాతికి అంకితం చేస్తారు. ఈ విగ్రహాన్ని తయారు చేసేందుకు 200మంది కళాకారులు ఏడాదిపాటు రాత్రింబగళ్లు శ్రమించారు.