వినాయక చవితి శుభాకాంక్షలు: ప్రధాని, రాష్ట్రపతి

వినాయక చవితి పండుగ సందర్భంగా దేశ ప్రజలకు శుభాకాంక్షలు చెప్పారు ప్రధాని నరేంద్రమోదీ, రాష్ట్రపతి రామ్​నాథ్ కోవింద్, ఉపరాష్ట్రపతి వెంకయ్య నాయుడు. భగవంతుడి ఆశీర్వాదాలు ఎల్లవేళలా దేశ ప్రజలపై ఉంటాయని మోదీ ట్వీట్​ చేశారు.

దేశ ప్రజలందరికీ వినాయక చవితి పండుగ సందర్భంగా శుభాకాంక్షలు తెలిపారు ప్రధాని నరేంద్ర మోదీ. గణేశుని ఆశీర్వాదాలు ఎల్లవేళలా ప్రజలపై ఉంటాయని ట్వీట్​ చేశారు. ఆనందోత్సాహాలతో సౌభాగ్యంగా ఉండాలని ఆకాంక్షించారు.

రాష్ట్రపతి రామ్​నాథ్​ కోవింద్ కూడా ప్రజలకు గణేశ్​ చతుర్థి శుభాకాంక్షలు తెలియజేశారు. ఈ పండుగ సమాజంలోని అన్నివర్గాలను కలుపుతుందని ట్వీట్​ చేశారు. కరోనా మహమ్మారిపై విజయం సాధించేందుకు భగవంతుడి సహకారం ఉంటుందని, అందరూ ఆయురారోగ్యాలతో సంతోషంగా ఉండేలా ఆశీర్వాదాలు ఉంటాయన్నారు.

ఇంట్లోనే జరుపుకోండి..

కరోనా నేపథ్యంలో ఈ సారి వినాయక చవితి పండుగను ఇళ్లలోనే జరుపుకొందామని ఉపరాష్ట్రపతి వెంకయ్యనాయుడు ప్రజలకు పిలుపునిచ్చారు. సమభావనకు ప్రతీకగా నిలిచే ఈ పండుగ ద్వారా బాలగంగాధర్​ తిలక్ సామూహిక సమావేశాలతో జాతీయవాద భావాలను వ్యాప్తి చేశారని గుర్తు చేశారు.