'కరోనా రోగులపై పని చేయని ప్లాస్మా చికిత్స'

కరోనా సోకిన వారిపై ప్లాస్మా థెరపీ మంచి ఫలితాలు ఇస్తోందన్న వాదనలు కొట్టిపారేసింది దిల్లీ ఎయిమ్స్​. ఈ చికిత్స రోగులపై పెద్దగా ప్రభావం చూపటం లేదని స్పష్టం చేసింది. ఇటీవలి ఫలితాల ప్రాథమిక విశ్లేషణ చేసి ఈ మేరకు వెల్లడించింది.

కరోనా రోగులపై ప్లాస్మా చికిత్స విధానం పెద్దగా ప్రభావం చూపించడం లేదని దిల్లీ ఎయిమ్స్‌ స్పష్టం చేసింది. కొవిడ్ రోగులపై నిర్వహించిన ప్లాస్మా చికిత్స ఫలితాల ప్రాథమిక విశ్లేషణలో ఈ మేరకు వెల్లడైందని ఎయిమ్స్‌ డైరెక్టర్‌ డాక్టర్ రణదీప్‌ గులేరియా తెలిపారు.

" ప్లాస్మా చికిత్స ఫలితాన్ని అంచనా వేయడానికి 15 మంది కొవిడ్ రోగులతో కూడిన రెండు బృందాలపై పరిశీలన జరిపాం. అందులో ఒక బృందానికి సాధారణ విధానంలో చికిత్స అందించగా...మరో 15 మందికి సాధారణ పద్ధతితో పాటు ప్లాస్మా చికిత్సను అందించాం. ఈ రెండు విధానాల్లోనూ మరణాల రేటు సమానంగా ఉన్నట్లు తమ ప్రాథమిక విశ్లేషణలో తేలింది."

​ -డాక్టర్​ రణదీప్​ గులేరియా, దిల్లీ ఎయిమ్స్​ డైరెక్టర్​

అయితే దీనిపై స్పష్టత కోసం మరింత పరిశోధన అవసరమని తెలిపారు గులేరియా. ప్లాస్మా చికిత్స వల్ల కొవిడ్‌ రోగులకు ఎలాంటి ప్రమాదం లేదన్న ఆయన...అదే సమయంలో ప్రయోజనం కూడా ఏమి లేదని స్పష్టం చేశారు.

ఇదీ చూడండి: కొవిడ్​ పంజా: 40 వేలు దాటిన మృతుల సంఖ్య