షహీన్​బాగ్ నిరసనల్లో తుపాకీ కలకలం

దేశ రాజధాని దిల్లీలోని షహీన్ బాగ్​లో సీఏఏకు వ్యతిరేకంగా చేపట్టిన నిరసన కార్యక్రమానికి ఓ వ్యక్తి తూపాకీ తీసుకురావడం కలకలం రేపింది. ఆందోళనకారుల మధ్యలో తుపాకీని గాల్లోకి ఎత్తగా... వాళ్లంతా అతడ్ని అడ్డుకున్నారు. గందరగోళం నడుమే అక్కడి నుంచి పరారయ్యాడు తుపాకీతో వచ్చిన వ్యక్తి.

పౌరసత్వ సవరణ చట్టానికి(సీఏఏ) వ్యతిరేకంగా దిల్లీలోని షహీన్ బాగ్​లో గత కొద్ది రోజులుగా ఆందోళనలు ఉద్ధృతంగా జరుగుతున్నాయి. మంగళవారం అక్కడకు ఓ వ్యక్తి తుపాకీతో రావడం కలకలం రేపింది. నిరసనలకారుల మధ్యలోకి వచ్చిన అతను తుపాకీని గాల్లోకి ఎత్తగానే అక్కడున్న వాళ్లంతా అడ్డుకున్నారు. పట్టుకునేందుకు ప్రయత్నించగా గందరగోళం మధ్యే వారి నుంచి తప్పించుకుని పారిపోయాడు ఆ వ్యక్తి.

సమాచారం తెలుసుకున్న పోలీసులు తుపాకీతో వచ్చిన వ్యక్తి కోసం గాలిస్తున్నారు. అతని పేరు మమ్మద్ లుక్​మాన్​ అని.. అతడికి లైసెన్సు ఉన్న తుపాకీ ఉన్నట్లు పోలీసు వర్గాలు తెలిపాయి. లుక్​మాన్ స్థిరాస్తి వ్యాపారం చేస్తారని చెప్పాయి.