సచిన్ పైలట్కు కాంగ్రెస్లో మంచి భవిష్యత్తు ఉందని చెప్పారు ఆ పార్టీ సినీయర్ నేత దిగ్విజయ్ సింగ్. జ్యోతిరాదిత్య సింధియాలా హస్తం పార్టీని వీడి భాజపాలో చేరకూడదని సూచించారు. ఇతర పార్టీల నుంచి ఆ పార్టీలోకి వెళ్లిన వారు ఎవరూ గుర్తింపు పొందిన దాఖలాలు లేవని పీటీఐ వార్తాసంస్థకు ఇచ్చిన ముఖాముఖిలో తెలిపారు దిగ్విజయ్. రాజస్థాన్లో ప్రస్తుత రాజకీయ సంక్షోభానికి భాజపాయే కారణమని విమర్శించారు.
"సచిన్ పైలట్ యువనేత. ఇంకా ఎన్నో సంవత్సరాలు రాజకీయాల్లో ఉంటారు. సీఎం అశోక్ గహ్లోత్ కారణంగా మనస్తాపం చెంది ఉండొచ్చు. చర్చించుకుంటే అన్ని సమస్యలు పరిష్కరించుకోవచ్చు.
26ఏళ్లకే పైలట్కు ఎంపీ. 32ఏళ్లకే కేంద్రమంత్రి పదవి అవకాశం వరించింది. 34ఏళ్లకే పీసీసీ అధ్యక్షుడయ్యారు. 38ఏళ్లకే డిప్యూటీ సీఎం అయ్యారు. పార్టీ నుంచి ఇంతకంటే ఎక్కువ ఏం కావాలి? భవిష్యత్తులో బ్రహ్మండమైన అవకాశాలున్నాయి. ఇతర పార్టీల నుంచి భాజపాలోకి వెళ్లిన నేతలెవరూ పైకి వచ్చిన దాఖలాలు లేవు. పైలట్కు మూడు,నాలుగు సార్లు ఫోన్ చేసినా, సందేశాలు పంపినా ఎలాంటి స్పందన లేదు. ఆయన నాకు కొడుకు లాంటి వారు. గతంలో ఎప్పుడు ఫోన్ చేసినా వెంటనే స్పందించేవారు. తన వర్గం 18మంది ఎమ్మెల్యేలపై పైలట్కు నిజంగా విశ్వాసం ఉంటే హరియాణాలోని మనేసర్ హోటల్లో ఎందుకు ఉంచడం? మహారాష్ట్ర, మధ్యప్రదేశ్, కర్ణాటక రాష్ట్రాల్లో రాజకీయ సంక్షోభాలు తలెత్తినప్పుడు భాజపా ఎమ్మెల్యేలు అదే హోటల్లో మకాం వేశారు."