'నేతాజీ అదృశ్యమై 74ఏళ్లు... ఇంతకీ ఏమైంది?'

భారత స్వాతంత్య్ర పోరాట యోధుడు నేతాజీ సుభాష్​ చంద్రబోస్​ అదృశ్యమై నేటికి 74 ఏళ్లు పూర్తయింది. ఈ సందర్భంగా ఆయన ఆచూకీపై ప్రశ్నించారు పశ్చిమ బంగ ముఖ్యమంత్రి మమతా బెనర్జీ. నేతాజీకి ఏం జరిగిందో తెలుసుకునే హక్కు ప్రజలకు ఉందంటూ ట్వీట్​ చేశారు.

నేతాజీ సుభాష్​ చంద్రబోస్​కు ఏం జరిగిందో తెలుసుకునే హక్కు ప్రజలకు ఉందని పేర్కొన్నారు పశ్చిమ బంగ ముఖ్యమంత్రి మమతా బెనర్జీ. నేతాజీ కనిపించకుండాపోయి నేటికి సరిగ్గా 74 ఏళ్లు పూర్తయిన సందర్భంగా ఆయన ఆచూకీపై ప్రశ్నిస్తూ ట్వీట్​ చేశారు.

మమత ట్వీట్​

"1945 ఆగస్టు 18న తైవాన్​లోని తైహోకు విమానాశ్రయం నుంచి నేతాజీ బయలుదేరారు. అప్పుడే ఆయన కనిపించకుండా పోయారు. ఆయనకు ఏం జరిగిందో ఇప్పటికీ తెలియదు. గొప్ప భూమిపుత్రుడి గురించి తెలుసుకునే హక్కు ప్రజలకు ఉంది."

-మమతా బెనర్జీ, పశ్చిమ బంగ ముఖ్యమంత్రి.

తైవాన్​ నుంచి బయలుదేరిన విమానం కూలిపోయి నేతాజీ చనిపోయినట్లు పలు నివేదికలు వెల్లడించాయి. కానీ దానికి తగిన సాక్ష్యాలు చూపించలేకపోయాయి.

నేతాజీ అదృశ్యంపై కేంద్ర ప్రభుత్వం పలు కమిటీలను నియమించింది. 1956లో షానవాజ్​ కమిటీ, 1970లో ఖోస్లా కమిషన్​, 2005లో ముఖర్జీ కమిషన్​లు బోస్​ అదృశ్యం వెనుక ఉన్న రహస్యాలను తెలుసుకునేందుకు ప్రయత్నించాయి. కానీ ఏ కమిటీ పూర్తిస్థాయిలో సమాధానమివ్వలేకపోయింది.

తైవాన్​ విమాన ప్రమాదంలో నేతాజీ చనిపోయినట్లు నిర్ధరించిన జపాన్​ ప్రభుత్వ నివేదికను 2016 సెప్టెంబర్​ 1న నరేంద్ర మోదీ నేతృత్వంలోని ప్రభుత్వం తిరస్కరించింది.

ఇప్పటికీ చాలా మంది నేతాజీ విమాన ప్రమాదం నుంచి తప్పించుకుని ఎక్కడో బతికే ఉన్నట్లు నమ్ముతారు.

ఇదీ చూడండి: గాంధీ 'ఐకమత్య' పునాదులతోనే నేటి శాంతి వెలుగులు