'2022 రాష్ట్రపతి ఎన్నికల అభ్యర్థిగా పవార్​'

జాతీయ రాజకీయాల్లో సీనియర్​ నేత, ఎన్​సీపీ అధినేత శరద్​ పవార్​ పేరును రాష్ట్రపతి పదవికి అన్ని పార్టీలు పరిశీలించాలన్నారు శివసేన ముఖ్య నాయకుడు సంజయ్ రౌత్. 2022లో రాష్ట్రపతి ఎన్నికల్లో పవార్​ పేరును ప్రతిపాదించాలని పిలుపునిచ్చారు రౌత్​.

రాష్ట్రపతి పదవి కోసం ఎన్​సీపీ అధినేత శరద్​ పవార్​ పేరును ప్రతిపాదించే అంశాన్ని అన్ని రాజకీయ పార్టీలు పరిశీలించాలని కోరారు శివసేన ముఖ్య నేత సంజయ్​ రౌత్. 2022లో రాష్ట్రపతి ఎన్నికలు జరిగేనాటికి ఆ పదవిని ఎవరు చేపట్టాలో నిర్ణయించేంత సంఖ్యాబలం తమకు ఉంటుందని ధీమా వ్యక్తంచేశారు రౌత్.

"దేశంలోని సీనియర్​ రాజకీయ నాయకుల్లో శరద్​ పవార్ ఒకరు. 2022లో జరగబోయే రాష్ట్రపతి ఎన్నికల్లో అన్ని పార్టీలు పవార్​ను ఎన్నుకునే అంశాన్ని పరిశీలించాలి. మిగతా పార్టీలు ఇతర సీనియర్లను రాష్ట్రపతి అభ్యర్థులుగా ప్రకటించే అవకాశం ఉంది. అయితే రాష్ట్రపతి అభ్యర్థి ఎవరో నిర్ణయించేంత సంఖ్యాబలం 2022 నాటికి మాకు ఉంటుంది."

- సంజయ్ రౌత్, శివసేన నాయకుడు

పలు దఫాలు కేంద్ర మంత్రిగా, నాలుగుసార్లు మహారాష్ట్ర ముఖ్యమంత్రిగా శరద్ పవార్​ పనిచేశారు. ఇటీవల మహారాష్ట్రలో సంకీర్ణ ప్రభుత్వం ఏర్పడటంలోనూ కీలకంగా వ్యవహరించారు.