నేడు సోనియాతో పవార్​ 'మహా' భేటీ

ఎన్​సీపీ అధ్యక్షుడు శరద్​ పవార్​ నేడు సోనియా గాంధీతో సమావేశంకానున్నారు. మహా ప్రతిష్టంభనకు తెరదించే విధంగా ఈ భేటీలో కీలక నిర్ణయం తీసుకునే అవకాశాలున్నాయి.

మహారాష్ట్రలో రాష్ట్రపతిపాలన కొనసాగుతున్న వేళ.. ప్రభుత్వ ఏర్పాటువైపు శివసేన-ఎన్​సీపీ-కాంగ్రెస్​ అడుగులు వేస్తున్నాయి. ఈ నేపథ్యంలో ఎన్​సీపీ అధ్యక్షుడు శరద్​ పవార్​.. కాంగ్రెస్​ అధ్యక్షురాలు సోనియా గాంధీతో నేడు భేటీకానున్నారు. మహారాష్ట్రలో రాజకీయ పరిస్థితులపై అగ్రనేతలు చర్చించనున్నారు.

పవార్​-సోనియా మధ్య భేటీ ఆదివారమే జరగాల్సి ఉంది. అయితే.. ఆదివారం పుణెలో ఎన్​సీపీ కోర్​ కమిటీ సమావేశం జరగడం వల్ల అగ్రనేతల భేటీ వాయిదా పడింది.

ఎన్​సీపీ కోర్​ కమిటీ సమావేశం ముగిసిన అనంతరం.. పవార్​-సోనియా గాంధీ మధ్య నేడు భేటీ ఉండనుందని ఆ పార్టీ సీనియర్​ నేత నవాబ్​ మాలిక్​ వెల్లడించారు.

"కోర్​ కమిటీ సమావేశంలో రాష్ట్రంలోని ప్రస్తుత రాజకీయాలపై చర్చించాం. రాష్ట్రంలో రాష్ట్రపతి పాలనకు ముగింపు పలికి.. ప్రభుత్వాన్ని ఏర్పాటు చేయాలనుకుంటున్నాం. పవార్​ సోనియా గాంధీతో సమావేశమవుతారు. ప్రభుత్వ ఏర్పాటు అవకాశాలపై చర్చిస్తారు."
--- నవాబ్​ మాలిక్​, ఎన్​సీపీ నేత.

మంగళవారం ఎన్​సీపీ-కాంగ్రెస్​ నేతలు సమావేశమై భవిష్యత్​ కార్యచరణపై చర్చిస్తారని మాలిక్​ స్పష్టం చేశారు.

'కూటమి ఏర్పడగలదా?'

వేరు వేరు సిద్ధాంతాలున్న పార్టీలు(సేన-ఎన్​సీపీ-కాంగ్రెస్​) కలిసి కూటమి ఏర్పాటు చేయగలవా అన్న ప్రశ్నకు సమాధానం వెతుకుతున్నట్టు మహారాష్ట్ర మాజీ ముఖ్యమంత్రి పృథ్విరాజ్​ చౌహాన్​ తెలిపారు.

మహారాష్ట్ర ఎన్నికల్లో భాజపా-శివసేన కూటమి.. ప్రభుత్వాన్ని ఏర్పాటు చేయడానికి కావాల్సిన మెజారిటీ సొంతం చేసుకుంది. కానీ ముఖ్యమంత్రి పీఠంపై మిత్రపక్షాల మధ్య విభేదాలు తలెత్తడం.. 'మహా' ప్రతిష్టంభనకు దారితీసింది. ప్రస్తుతం రాష్ట్రపతి పాలనలో కొనసాగుతోంది మహారాష్ట్ర.