'అమ్మకు వీల్​ చైర్​ అడిగితే జైలులో పెడతానన్న పైలట్'

బెంగళూరులో తనను జైలులో పెడతానని ఇండిగో పైలట్​ బెదిరించినట్లు ఓ ప్రయాణికురాలు ట్విట్టర్​ వేదికగా ఆరోపించింది. తన తల్లికి వీల్​ చైర్​ కావాలని అడిగినందుకు ఇలా అనుచితంగా ప్రవర్తించాడని తెలిపింది. కాసేపటికే ఆ పైలట్​ను విధుల నుంచి తప్పించినట్లు ట్వీట్​ చేశారు కేంద్ర మంత్రి.

ప్రయాణికుల పట్ల అనుచితంగా ప్రవర్తించిన ఓ పైలట్​ను విధుల నుంచి తప్పించింది ఇండిగో సంస్థ. సుప్రియా ఉన్ని నాయర్​ అనే ప్రయాణికురాలు సోమవారం రాత్రి తన 75 ఏళ్ల తల్లితో కలిసి బెంగళూరు విమానాశ్రయంలో దిగారు. తన తల్లి మధుమేహంతో బాధపడుతున్నారని, చక్రాల కుర్చీ కావాలని సిబ్బందిని కోరారు. అయితే... పైలట్​ మాత్రం అనుచితంగా సమాధానం ఇచ్చినట్లు ఆరోపించారు సుప్రియ. ఎక్కువ మాట్లాడితే జైలులో పెడతానని బెదిరించినట్లు ట్వీట్ చేశారు.

ఈ విషయంపై విమానయాన శాఖ మంత్రి హర్దీప్​ సింగ్​ పూరి స్పందించారు.

"పైలట్​ అనుచితంగా ప్రవర్తించినట్లు సుప్రియా ఉన్ని నాయర్​ ట్వీట్​ చూడగానే నేను వెంటనే ఇండిగో సంస్థను సంప్రదించాను. ఆ పైలటన్​ను విధుల నుంచి తొలగించినట్లు ఆ సంస్థ పౌర విమానయాన మంత్రిత్వ శాఖకు తెలియజేసింది. ఇందుకు సంబంధించి పూర్తి విచారణను జరుగుతోంది."

-హర్దీప్​ సింగ్​ పూరి, విమానయాన శాఖ మంత్రి

ఇదీ చూడండి:2020లో కొత్త ఉద్యోగాలు కష్టమే..!