రాజ్యాంగానికి 70ఏళ్లు.. 26న ఉభయ సభల సమావేశం

నవంబరు 26 నాటికి రాజ్యంగ సభ భారత రాజ్యాంగాన్ని ఆమోదించి 70 ఏళ్లు పూర్తవుతుంది. ఈ సందర్భంగా పార్లమెంటు ఉభయ సభల సంయుక్త సమావేశాన్ని ఏర్పాటు చేయాలని భావిస్తోంది కేంద్రం. సమావేశానికి మాజీ రాష్ట్రపతులు, ప్రధానులు హాజరయ్యే అవకాశముంది.

భారత రాజ్యాంగాన్ని ఆమోదించి 70 ఏళ్లు పూర్తవుతున్న సందర్భంగా నవంబరు 26న పార్లమెంటు ఉభయసభల సంయుక్త సమావేశం ఏర్పాటు చేయాలని కేంద్ర ప్రభుత్వం భావిస్తోంది. రాష్ట్రపతి రామ్‌నాథ్ కోవింద్, ప్రధాని నరేంద్ర మోదీ ప్రసంగించే అవకాశాలు ఉన్నాయి. ఉపరాష్ట్రపతి వెంకయ్యనాయుడు, లోక్‌సభ స్పీకర్‌ ఓం బిర్లా ఈ కార్యక్రమంలో సందేశాన్ని ఇచ్చే సూచనలు కనిపిస్తున్నాయి.

పార్లమెంటు సెంట్రల్ హాల్‌లో నిర్వహించ తలపెట్టిన ఉభయ సభల సంయుక్త సమావేశానికి ఎంపీలే కాకుండా మాజీ రాష్ట్రపతులు, ప్రధానులను ఆహ్వానించే అవకాశముందని అధికారిక వర్గాలు వెల్లడించాయి. నవంబరు 26న ఉదయం నిర్వహించే ఈ సమావేశం దాదాపు రెండు గంటలు జరిగే అవకాశముంది.

1949 నవంబరు 26న రాజ్యాంగ సభ రాజ్యాంగాన్ని ఆమోదించింది. 1950 జనవరి 26 నుంచి భారత రాజ్యాంగం అమల్లోకి వచ్చింది.

ఇదీ చూడండి: ప్రతిపక్ష పాత్రకే ఎన్​సీపీ పరిమితం- ఊహాగానాలకు పవార్​ తెర