'భారత్​ మ్యాప్​' మళ్లీ మార్చేందుకు పార్లమెంట్ ఆమోదం

ఇప్పటివరకూ రెండు కేంద్రపాలిత ప్రాంతాలుగా ఉన్న దమన్​ ​దీవ్​, దాద్రానగర్‌ హవేలీని విలీనం చేసే బిల్లును పార్లమెంట్​ ఆమోదించింది. ఈ బిల్లుకు లోక్​సభ ఇదివరకే పచ్చజెండా ఊపగా.. తాజాగా మూజువాణి ఓటు ద్వారా రాజ్యసభ ఆమోదం తెలిపింది. 2019-ఓడల పునర్వినియోగ నియంత్రణ బిల్లు లోక్​సభలో ఆమోదం పొందింది.

రెండు కేంద్రపాలిత ప్రాంతాలు(యూటీ)గా ఉన్న దమన్​​ దీవ్​, దాద్రా నగర్‌ హవేలీని పరిపాలనా సౌలభ్యం తదితర కారణాలతో విలీనం చేయనుంది కేంద్రం. ఈ మేరకు రెండింటిని ఒకే యూటీగా మార్చే 2019-దాద్రానగర్‌ హవేలీ, దమన్​ ​దీవ్ (కేంద్రపాలిత ప్రాంతాల విలీనం) బిల్లుకు పార్లమెంట్​ ఆమోదం తెలిపింది. ఈ బిల్లును లోక్​సభ ఇదివరకే ఆమోదించగా.. తాజాగా మూజువాణి ఓటుతో పెద్దల సభ ఆమోదం తెలిపింది.

దమన్​​ దీవ్​, దాద్రా నగర్‌ హవేలీ కేంద్రపాలిత ప్రాంతాలు కేవలం 35 కి.మీ. దూరంలో ఉన్నప్పటికీ ఇరు ప్రాంతాలకు వేర్వేరు సచివాలయాలు ఉన్నాయి. దాద్రా నగర్‌ హవేలీలో ఒక జిల్లా ఉండగా... దమన్​​ దీవ్​లో రెండు జిల్లాలు ఉన్నాయి.

కొత్తగా ఏర్పడే యూటీ పేరు.. దాద్రా నగర్‌ హవేలీ, దమన్​​ దీవ్​గా మారనుంది. నూతన యూటీ ప్రధాన కేంద్రంగా దమన్​ దీవ్​ ఉండే అవకాశముంది.

28 రాష్ట్రాలు, 8 కేంద్ర పాలిత ప్రాంతాలు

జమ్ముకశ్మీర్‌కు ప్రత్యేక ప్రతిపత్తి కల్పించే ఆర్టికల్‌ 370ని కేంద్ర ప్రభుత్వం ఆగస్టు 5న రద్దు చేసి... రెండు కేంద్రపాలిత ప్రాంతాలుగా విభజించింది. ఈ కారణంగా దేశంలో ప్రస్తుతం 9 యూటీలు ఉన్నాయి. అయితే దమన్​ ​దీవ్​, దాద్రానగర్‌ హవేలీ విలీనంతో దేశంలో కేంద్రపాలిత ప్రాంతాల సంఖ్య ఎనిమిదికి తగ్గనుంది.

ఓడల పునర్వినియోగ నియంత్రణ బిల్లుకు లోక్​సభ ఆమోదం

అంతర్జాతీయ ప్రమాణాల ప్రకారం... ఓడల పునర్వినియోగ నియంత్రణ బిల్లు-2019కు లోక్​సభ ఆమోదం తెలిపింది. ఈ కొత్త బిల్లు ఓడల పునర్వినియోగ రంగానికి ఊతమిస్తుందని, అనేక మందికి ఉద్యోగ అవకాశాలు కల్పిస్తుందని కేంద్ర మంత్రి మాన్సుఖ్​​ మాండవీయ తెలిపారు.