ఎల్​ఓసీలో అలజడులకు పాక్​ సైన్యం ప్రయత్నాలు

నియంత్రణ రేఖ వద్ద అలజడులు సృష్టించేందుకు పాక్​ సైన్యం ప్రయత్నిస్తోందని భారత సైన్యాధికారులు వెల్లడించారు. పాక్​ ఆక్రమిత కశ్మీర్(పీఓకే)​లోని స్థానికులతో నియంత్రణ రేఖ వద్ద నేడు ర్యాలీ​ నిర్వహించేందుకు ప్రయత్నాలు జరుగుతున్నాయని తెలిపారు.

పాకిస్థాన్​ ఆక్రమిత కశ్మీర్​లో స్థానికులతో నేడు నిరసన ర్యాలీ నిర్వహించాలని ఆ దేశ సైన్యం ప్రయత్నిస్తోందని భారత అధికారులు తెలిపారు. జమ్ము కశ్మీర్​ స్వయం ప్రతిపత్తి రద్దుపై అక్కసుతో అక్కడి స్థానికులను పాక్​ సైన్యం రెచ్చగొడుతోందని ఆరోపించారు.

నియంత్రణ రేఖ వద్ద అలజడులు సృష్టించేందుకు పాక్​ సైన్యం తీవ్రంగా ప్రయత్నిస్తోందని తెలిపారు అధికారులు. అంతర్జాతీయంగా కశ్మీర్​ విషయంలో భారత్​పై వ్యతిరేకత సృష్టించి లాభపడాలని పాక్​ భావిస్తోందని తెలిపారు.

అప్రమత్తంగా ఉన్నాం: భారత సైన్యం

ఎలాంటి పరిస్థితులనైనా ఎదుర్కొనేందుకు భారత సైన్యం సిద్ధంగా ఉందని స్పష్టం చేశారు ఆర్మీ ఉన్నతాధికారులు. పాక్​ సైన్యం కుయుక్తులను తిప్పి కొడుతామన్నారు. నియంత్రణ రేఖ వద్ద కృత్రిమ ఉద్రిక్తతలు సృష్టించే ఈ ప్రయత్నాలను భగ్నం చేస్తామని ప్రకటించారు.

ఇదీ చూడండి: స్వచ్ఛభారత్​ కోసం వింగ్​ కమాండర్​ వినూత్న ఫీట్​